Әйелдер арасындағы инфаркттың жасырын белгілері қандай?

Инфаркт миокарды әрдайым кеуде тұсының айқын ауырсынуымен басталмайды, бұл дертті дер кезінде анықтауға кедергі келтіреді. Әсіресе әйелдерде, егде жастағы адамдарда және қант диабетімен ауыратын науқастарда бұл ауру өзге клиникалық белгілермен бүркемеленуі мүмкін. Ұлттық шұғыл медицинаны үйлестіру орталығының кардиологы Гүлнұр Қанафина инфаркттың жасырын ағымы мен оның алғашқы белгілерін ажырату жолдарын Курсив басылымына берген сұхбатында мәлімдеді.

Маманның түсіндіруінше, әйелдердегі жүрек ұстамасының клиникалық көрінісі көбіне бейспецификалық сипатқа ие. Салдарынан науқастар медициналық көмекке кеш жүгінеді.

«Әйелдерде инфаркт басталғанға дейін бірнеше күн бұрын айтарлықтай әлсіздік, тыныс алудың қиындауы (демікпе), жүрек айну, сондай-ақ арқа немесе мойын тұсының жайсыздығы байқалуы мүмкін. Көп жағдайда науқастар бұл белгілерді созылмалы шаршаумен, гастритпен немесе күйзеліспен шатастырып, дер кезінде бағаламайды», — деп атап өтті Гүлнұр Қанафина.

Үй жағдайында ауру түрлерін нақты ажырату күрделі болғанымен, кардиолог мынадай негізгі айырмашылықтарды көрсетті:

Инфаркт миокарды: Ауырсыну ұзаққа созылады (15-20 минуттан астам), басып немесе күйдіріп ауырады. Симптомдар дене қозғалысына байланысты өзгермейді, ауырсыну сол қолға, төменгі жаққа, мойынға немесе арқаға таралуы (иррадиациялануы) мүмкін.

Қабырғааралық невралгия: Ауырсыну сезімі дене бұрылысында, терең тыныс алғанда күшейеді және зақымдалған нүктені пальпациялау (басып көру) кезінде анық сезіледі.

Қыжыл (гастроэзофагеальді рефлюкс): Ас қабылдаумен тікелей байланысты және антацидті препараттарды қолданғаннан кейін басылады.

Сонымен қатар кардиолог медицинада «ауырсынусыз инфаркт» формасының жиі кездесетінін ескертті. Мұндай патология көбіне қант диабетіне шалдыққан және жүйке сезімталдығы бұзылған егде жастағы адамдарда тіркеледі. Науқас тек жалпы әлсіздік пен тершеңдікті сезінуі мүмкін, ал аурудың ізі кейіннен ЭКГ немесе ЭхоКГ зерттеулері кезінде ғана анықталады.

Дәрігердің айтуынша, симптомдар басталған алғашқы 60 минут ішінде медициналық көмек көрсетіліп, қан ағымы қалпына келтірілсе, миокардтың зақымдану деңгейін барынша азайтуға болады. Бұл жүрек жеткіліксіздігі мен өлім-жітім қаупін айтарлықтай төмендетеді.

Алғашқы көмек көрсету алгоритмі: Жедел жәрдем шақырылғаннан кейін науқасты отырғызып, толық тыныштықпен қамтамасыз ету, сондай-ақ бөлмеге таза ауаның келуін ұйымдастыру қажет. Нақты диагноз қойылғанға дейін науқастың физикалық белсенділік танытуына, өздігінен көлік басқаруына және бақылаусыз дәрілік заттарды қабылдауына қатаң тыйым салынады.