Айбек Дәдебай Құрылтайдың заң шығару жұмысындағы басымдықтарды атады

Құрылтай Төрағасы Айбек Дәдебай Бюро отырысын өткізіп, заң шығару қызметінің алдағы кезеңге арналған негізгі басымдықтарын белгіледі. Бұл туралы Құрылтайдың баспасөз қызметі хабарлады.

Бірінші кезектегі міндеттердің бірі – қолданыстағы заңнаманы түгендеп, оны жаңа Конституция талаптарына сәйкестендіру. Бұл бағыт Президент Қасым-Жомарт Тоқаев айқындаған міндеттермен және өзекті әлеуметтік-экономикалық, қоғамдық-саяси мәселелермен бірге тұрақты комитеттердің жұмыс жоспарына енгізіледі.

Депутаттар жасанды интеллект пен цифрлық активтерді дамыту, көші-қон саясатын жетілдіру, ерекше қажеттіліктері бар балаларды қолдау, энергетикалық тұрақтылық пен баламалы энергетиканы дамыту мәселелерін қарайды. Сондай-ақ онлайн-платформалар мен бұқаралық ақпарат құралдарының қызметін реттеу де жұмыс бағыттарының бірі болады.

Құрылтай алдағы үш жылға арналған республикалық бюджетті де жеке бағыт ретінде қарамақ.

Айбек Дәдебай парламенттік бақылаудың тиімділігін арттыру, депутаттардың халықпен тұрақты байланысын қамтамасыз ету және «Е-Parliament» жүйесін жедел енгізу қажеттігін атап өтті.

Бюро отырысында Құрылтай Регламентінің жобасын әзірлеуге қатысты міндеттер де белгіленді. Сонымен қатар Құрылтай Төрағасының орынбасарларына тұрақты комитеттерге жетекшілік ету міндеті бекітілді.