Австралия балаларға әлеуметтік желіні бұғаттады, бірақ мектеп оқушыларының 80%-ы әлі отыр

Австралияда 16 жасқа толмаған жасөспірімдерге әлеуметтік желілерді пайдалануға салынған тыйым күшіне енгеннен кейін үш ай өтсе де, мектеп оқушыларының 80%-дан астамы бұл платформаларды белсенді қолдануды жалғастыруда. Елдің интернет-реттеушісі (eSafety) жүргізген зерттеу нәтижесі технологиялық компаниялардың жасты тексеру жүйесін тиімді енгізе аламғанын көрсетті.

Өткен жылдың 10 желтоқсанында күшіне енген әлемдегі алғашқы бұл бастама балалардың психикалық және дене денсаулығын қорғауға бағытталған еді. Дегенмен eSafety есебіне сәйкес, тыйым салынғанға дейін 10–15 жас аралығындағы балалардың 86%-ы әлеуметтік желілерді пайдаланса, наурыз айында бұл көрсеткіш тек 81%-ға дейін ғана төмендеген. Тіпті күнделікті кіретіндердің үлесі де айтарлықтай өзгермеген (60%-дан 58%-ға дейін).

Есепте көрсетілгендей, тіркелгілердің меншік үлесі 52%-дан 42%-ға азайғанымен (әсіресе YouTube, Snapchat және TikTok желілерінде), оқушылар бұрынғы аккаунттарын сақтап қалған немесе жаңадан ашып алған. Сауалнамаға қатысқан балалардың жартысына жуығы платформа тарапынан ешқандай жас тексерісі болмағанын айтса, кейбірі өз жасын 16-дан жоғары етіп көрсеткен немесе тексеру жүйесін алдап өткен.

Жағымсыз салдары мен жаңа трендтер

Зерттеу барысында бірқатар жағымсыз үрдістер анықталды:

• Ата-ана бақылауының төмендеуі: Шектеу енгізілгелі бері ата-аналардың балаларының желідегі әрекеттерінен хабардар болу деңгейі төмендеген. Бұл балалардың киберқауіптерге тап болған жағдайда көмек сұрауын немесе ерте араласу мүмкіндігін қиындатуы мүмкін.

• Мессенджерлер мен ойындардың танымалдығы: Оқушылар мессенджерлерді, онлайн ойындарды және Reddit платформасын (қолданушылар үлесі 6%-дан 9%-ға өскен) жиірек пайдалана бастаған.

• Спорт пен өнерге әсер етпеді: Заң қабылданғанда балалар бос уақытын физикалық белсенділікке, спорт пен өнерге арнайды деген үміт ақталмады - бұл бағыттарда ешқандай өзгеріс байқалмады.

Айта кету керек, сауалнамаға қатысқан балалардың 65%-дан астамы бұл тыйымның өздерінің психикалық жағдайына ешқандай әсер етпегенін алға тартқан. Екі жылға есептелген бұл ауқымды зерттеуді әлеуметтік желілерге ұқсас шектеулер енгізуді жоспарлап отырған басқа мемлекеттер де жіті бақылауда ұстап отыр.