Ауыл тұрғындарының табысы артпақ: Абай облысында кәсіпкерлікке жол ашқан бағдарлама қалай жұмыс істеуде

Абай облысының әкімі Берік Уәлидің төрағалығымен өткен кеңейтілген аппараттық кеңесте «Ауыл аманаты» бағдарламасының өңірдегі іске асырылу барысы талқыланды. Жиында ауыл шаруашылығы басқармасының басшысы Ертай Қуанбаев атқарылған жұмыстар жөнінде есеп берді, деп хабарлайды Абай облысы әкімінің баспасөз қызметі.

Ағымдағы жылы бағдарлама аясында облыстың 10 ауданына қарасты 138 ауылдық округте арнайы скрининг жүргізіліп, әрбір елді мекеннің әлеуметтік-экономикалық әлеуеті жан-жақты бағаланды. Зерттеу нәтижесінде барлық ауылдық округ 2025 жылғы несиелеу бағдарламасына енгізіліп, жұмыс жүйелі түрде жолға қойылды.

Өткен кезеңде бағдарламаны жүзеге асыруға 1 млрд теңге қаржы бөлініп, ол қаражат негізінен ауыл шаруашылығы өнімдерін қайта өңдеу, өндірістік кооперацияны нығайту және сүтті бағыттағы мал шаруашылығын қолдауға бағытталды. Қазіргі таңда Amanatnesie.kz ақпараттық жүйесі арқылы жалпы сомасы 863,8 млн теңгеге 48 өтінім түсіп, оның ішінде 534,4 млн теңгеге 25 жоба қаржыландырылды.

Жиын барысында өңірдің азық-түлік қауіпсіздігін қамтамасыз ету үшін сүт, ет және көкөніс өнімдерін өндіру, сақтау және қайта өңдеу жобаларына басымдық берілетіні атап өтілді. Биылғы жылға қосымша 4,5 млрд теңге бөлу жоспарланған. Алдағы уақытта ауылдық жерлерде сүт қабылдау пункттері, шағын өңдеу цехтары ашылып, қой шаруашылығын дамыту бойынша инвестициялық бастамалар жүзеге асырылмақ.

Облыс әкімі Берік Уәли жауапты басқармалар мен аудан әкімдеріне бөлінген қаражаттың мақсатты әрі тиімді игерілуін қатаң бақылауға алуды тапсырды. Сондай-ақ 2026 жылға арналған жобалар пулын жедел қалыптастыру және кооперативтердің жұмысын жандандыру қажеттігін ескертті.

«Абай облысында ауыл шаруашылығы, қайта өңдеу, қызмет көрсету және басқа да бағыттарды дамытуға қажетті әлеует жеткілікті. Сондықтан біз үшін жобаны сапалы іске асыру, жеңілдетілген несиелердің мақсатты әрі тиімді игерілуін қамтамасыз ету, жаңа кәсіпкерлік бастамаларды қолдау және тұрақты жұмыс орындарын құру ерекше маңызға ие. Біздің басты мақсатымыз – ауыл тұрғындарының әл-ауқатын арттырып, олардың тұрақты табыс көздерін қалыптастыру арқылы ауылдық елді мекендердің орнықты дамуын қамтамасыз ету», – деді облыс әкімі Берік Уәли.

Кездесу қорытындысы бойынша ауыл тұрғындары арасында кең көлемді түсіндіру жұмыстарын жүргізу және кәсіпкерлік бастамаларды қолдау арқылы өңірдің агроөнеркәсіптік әлеуетін күшейту міндеті жүктелді.