Аутизмі бар балаға дөрекі сөйлеген әйел қоғам наразылығын туғызды – Оқу-ағарту министрлігі түсініктеме берді

Әлеуметтік желілерде Астанадағы қоғамдық көлікте ересек әйелдің аутизм диагнозы бар қыз баланың анасымен сөзге келіп, балаға қатысты келемеж сөздер айтқаны бейнеленген видео тарады. Балалардың құқықтарын қорғау комитеті әйелдің бұл әрекетіне байланысты алаңдаушылық білдірді. Бұл туралы ҚР Оқу-ағарту министрлігі мәлімдеді.

"Қызыңызды алыңызшы, ол менің жыныма тиіп тұр!" – деген әйел баланың анасына.

Министрлік мәлімдемесінде әрбір бала даму ерекшеліктеріне қарамастан, құрметке, қорғауға және қоғам өміріне толыққанды қатысуға құқылы делінген.

"Мұндай әрекет – мүлде жол берілмейтін жағдай. Қазіргі уақытта видеодағы әйелдің жеке басы анықталып жатыр. Барлық ересекті балалардың құқықтарын қатаң сақтауға және кез келген жағдайда олардың қауіпсіздігін қамтамасыз етуге шақырамыз", – делінген.

Сондай-ақ ведомство балалардың құқықтарын қорғау мен инклюзивті білім беруді дамыту мәселелері министрліктің басты назарында екенін атап өтті.