Аутизмді толық емдеу мүмкін бе? Денсаулық сақтау министрлігі желідегі жарнамалардың сырын ашты

ҚР Денсаулық сақтау министрлігі әлеуметтік желілерде жиі кездесетін «аутизмді толық емдеп шығуға болады» деген жарнамалар мен «псевдоаутизм» туралы қауесеттерге сенбеуге шақырды. Ведомство мамандары азаматтарды мұндай ақпараттарға сын көзбен қарауды сұрайды.

Министрліктің мәлімдеуінше, аутизм — бұл қандай да бір сиқырлы дәрімен немесе күмәнді әдістермен емдеп жазатын ауру емес, ол жүйке жүйесінің даму ерекшелігі (аутистік спектрдің бұзылуы). Желідегі жалған уәделер мен ғылыми негізсіз емдеу тәсілдері ата-аналарды адастырып қана қоймай, балаға кәсіби көмек көрсетуге қажетті алтын уақытты ұрлайды.

Денсаулық сақтау министрлігі аутизмнің пайда болуына екпелердің (вакцина) немесе телефон мен гаджеттердің ешқандай қатысы жоқтығын тағы бір мәрте еске салды. Бұған дейін инфекционист-дәрігер Динагүл Баешева ата-аналар арасындағы ең үлкен мифтің сырын түсіндірген болатын.

Аутизмнің алғашқы белгілері баланың 1,5–2 жасында, яғни жоспарлы ревакцинация (қайта екпе салу) кезеңінде анық байқала бастайды. Ата-аналардың бұл екі жағдайды байланыстыруы — тек уақыт шендестігі, яғни кездейсоқ сәйкестік қана. Дәрігерлер қазіргі уақытта екпеден бас тартудың кесірінен қызылша, көкжөтел сияқты ауыр аурулардың зардабымен жиі бетпе-бет келіп жатқандарын айтып, дабыл қағуда.

Мамандардың пікірінше, аутизмі бар бала үшін ең маңыздысы — ерекшелікті ерте анықтап, уақытында кәсіби мамандардың көмегіне жүгіну және отбасының қолдауы.