Australian Open-2026: 17 жастағы қазақстандық теннисші жарақатына қарамастан жартылай финалға шықты

Қазақстандық Заңғар Нұрланұлы Аустралияның аптап ыстығында сіңірі тартылғанына қарамастан, жасөспірімдер арасындағы АО-2026 ширек финалында гонконгтық Кай Томпсонды жеңді.

Мельбурнде өткен үш сағаттық драмалық матч 3:6, 7:6, 6:4 есебімен аяқталып, отандасымыз жартылай финалға жолдама алды.

Алғашқы сетте Заңғар қатты ауырсыну сезініп, медициналық көмекке жүгінді. Соған қарамастан, екінші сетте тай-брейкте (7:4) есепті теңестіре білді. Шешуші партияда қазақстандық теннисшінің сіңірі тартылып, ақсаңдап жүрсе де, ерік-жігерінің арқасында жеңіске жетті.

Енді финал жолдамасы үшін ол америкалық Китон Ханспен кездеседі. Айта кетейік, бұған дейін Елена Рыбакина мен Анна Данилина да Australian Open финалдарына жолдама алған болатын.