«Аурухана емес, мәйітхана»: анасы да, баласы да бір мекемеде жан тапсырды

Жамбыл облысы Тұрар Рысқұлов ауданына қарасты Құлан ауылында 6 жасар баланың өлімі жұртты дүр сілкіндірді. Туыстарының айтуынша, дәрігерлердің салғырттығы мен уақытылы көмек көрсетілмеуі кішкентай Әлидің өмірін жалмады.

Әли 29 қыркүйек күні өзін жайсыз сезініп, дәрігерге барған. Алайда медициналық қызметкер баланы тек қарап, “ештеңе етпейді” деп үйіне жіберген. Кейін жағдайы нашарлаған соң, әжесі ауруханаға қайта барып, дәрігерлерге жалбарынып, тіпті тізерлеп сұрағаннан кейін ғана 7 қазан күні немересін жатқыза алған.

Дегенмен ауруханаға түскен соң да нақты диагноз қойылмаған, тек “Креон” препараты жазылып берілген. Баланың жағдайы күн сайын қиындап, ақыры 10 қазан күні көз жұмған.

“Дәрігерлер баламның жағдайына салғырт қарады. Әлидің өмірі құтқарылуы мүмкін еді, егер дер кезінде назар аударғанда”, — дейді көз жасы көл болған әжесі.

Қайғыдан қан жұтқан отбасы бұған дейін де дәл осы ауруханада ауыр соққы көрген: екі жыл бұрын Әлидің анасы да дәл сол мекемеде көз жұмған.

Қазір оқиға бойынша тексеріс жүргізу туралы талап қойылып отыр. Халық “аурухана емес, ажал ордасына” айналған бұл мекемеге жауаптылар жазалансын деп талап етуде.