Аудит талабын орындамаған 18 шенеунік жауапқа тартылды

Жоғары аудиторлық палатаның ресми нұсқамаларын орындамағаны немесе тиісінше орындамағаны үшін 18 лауазымды адам және 4 мемлекеттік орган әкімшілік жауапқа тартылғаны белгілі болды.

Жоғары аудиторлық палата нұсқамасы – мемлекеттік аудит барысында анықталған бұзушылықтарды, жауапты тұлғаларды және оларды жою мерзімін нақтылайтын ресми құжат. Бұл тек жазалау механизмі емес, республикалық деңгейдегі жүйелі кемшіліктердің алдын алуға бағытталған бақылау тетігі. Палата мамандары әр нұсқаманың орындалу барысын тұрақты қадағалап отырады.

1 қазандағы жағдай бойынша нұсқамалардың орындалмауына байланысты әкімшілік жазаға тартылғандар қатарында Ұлытау облысы әкімінің орынбасары, Түркістан қаласы әкімінің орынбасары, Ұлытау облысы Жаңаарқа ауданы әкімінің орынбасары және Медициналық және фармацевтикалық бақылау комитеті төрағасының міндетін атқарушы бар.

Сонымен бірге «Семей» ӘКК» АҚ-ның бірнеше қызметкері, облыстық басқарма басшылары, қала бөлімдерінің меңгерушілері, бірқатар министрлік департаменттерінің директорлары да жауапкершілікке тартылды.

Әкімшілік жаза ұйымдарға да қолданылды. Төрт заңды тұлға жауапқа тартылған: Қаржы министрлігінің Мемлекеттік кірістер комитеті, Су ресурстары және ирригация министрлігінің Су ресурстарын реттеу, қорғау және пайдалану комитеті, Көлік министрлігінің Автомобиль жолдары комитеті және Қызылорда облысы әкімі аппараты.

Сонымен қатар нұсқамалардың бірқатар тармағы орындалмағаны үшін Ұлытау облысының Жезқазған, Сәтбаев қалалары мен Ұлытау ауданы әкімдіктеріне қатысты сотқа талап қою бастамасы көтерілді. Құжаттар сот қарауында.