Атырауда жоғалған отбасы ісі: күдікті халықаралық іздеуге жарияланды

Атырау облысында жоғалған отбасыға қатысты қылмыстық іс бойынша қаза тапқандардың күйеу баласы Сұлтан Сәрсемалиев халықаралық іздеуге жарияланды. Ол іс аясында күдікті мәртебесіне ие. Ал марқұмдардың қызы Ақбаян Мұқанғалиеваны іздеу Қазақстан аумағынан тыс жерлерде де жүргізіліп жатыр. Алайда ол күдікті ретінде емес, із-түзсіз жоғалып кеткен деп іздестіріліп жатыр.

Тергеу деректеріне сәйкес, 6 қаңтар күні сарайдан ерлі-зайыпты Мақсот Қарабалин мен Нәсіп Үтешқалиеваның мәйіттері табылған. Олардың денелері шамамен бір жарым метр тереңдікте жерге көмілген күйде болған.

Қазіргі уақытта отбасының тағы екі мүшесінің тағдыры белгісіз. Құқық қорғау органдары оларды іздестіру жұмыстарын жалғастырып жатыр. Тергеу амалдары жүріп, істің барлық мән-жайын анықтауға бағытталған шаралар қабылдануда.