Атырауда тексерістен кейін полиция басшылары қызметінен шеттетілді

Атырау қалалық полиция басқармасының басшысы мен облыстық полиция департаментінің екі басқарма жетекшісі қызметінен шеттетілді, деп хабарлады Ішкі істер министрлігі. Бұл шешім тексеріс барысында анықталған өрескел заңбұзушылықтарға байланысты қабылданған.

Министрлік мәліметінше, қызметтік тәртіптің сақталмауы, бақылаудың әлсіздігі және жұмысты дұрыс ұйымдастырмау фактілері тіркелген. Осыған байланысты қала полиция басқармасының басшысы, сондай-ақ ішкі қауіпсіздік және есірткі құқық бұзушылықтарына қарсы іс-қимыл басқармаларының жетекшілері лауазымынан уақытша шеттетілген.

«Ақ Жайық» басылымының жазуынша, тексерісті ІІМ-нің ішкі қауіпсіздік департаменті жүргізген. Соның нәтижесінде Атырау қалалық полиция басқармасының бастығы Бақтыбек Исаев, облыстық есірткі қылмысына қарсы күрес басқармасының жетекшісі Әлішер Нұршаев, ішкі қауіпсіздік басқармасының басшысы Саламат Калиев және кадр қызметінің жетекшісі қызметінен айырылған.

Басылым дерегінше, кадрлық шешімдерге кейбір полиция қызметкерлерінің есірткі заттарының заңсыз айналымына қатысы болуы және бағыныштылардан ақша талап етуі себеп болуы мүмкін. Ресми органдар бұл жайт бойынша қосымша түсініктеме бермеді.