Атырауда балалар тәттісіз қалды: Сыйлыққа бөлінген ақша бюджетке қайтарылды

Атырауда жаңажылдық сыйлықтар төңірегінде дау шықты. Тендерді ұтып алған кәсіпкердің 600 дана мерекелік пакетін әкімдік қабылдамай тастады, деп хабарлайды «Ақ Жайық». 

Сыйлықтар тексерістен өтпей, бөлінген қаржы мемлекетке қайтып кеткен.
Кәсіпкер бұл жағдайдан кейін 2,7 миллион теңге шығынға батқанын айтып шағымдануда. Сонымен қатар компания «жосықсыз өнім берушілер» тізіміне (қара тізімге) енгізілген. Бұл ендігі жерде мемлекеттік сатып алуларға қатысу жолы жабылды деген сөз.

“Тәттілер жиынтығы техникалық тапсырмаға мүлдем сай келмеген”,-деп пікір білдірді Білім бөліміндегілер.
 

• Ереже бойынша пакетте 17 түрлі тәтті болуы тиіс еді, бірақ іс жүзінде небәрі 10 түрі ғана болған.
• Сыйлықтардың салмағы да белгіленген нормадан жеңіл болып шыққан.

Бұл жерде қызық дерек:
⭕ Сыйлықтың бастапқы бағасы — 10 714 тг болған.
⭕ Тендер жеңімпазы бір пакетті 4 990 теңгеге дайындауға уәде берген.
⭕ Байқауға барлығы 17 кәсіпкер қатысқан.

Қалалық білім бөлімінің нақтылауынша, бұл қосымша тендер болған. Әлеуметтік аз қамтылған отбасылардың балаларына арналған негізгі 1162 сыйлықты басқа кәсіпкер ешқандай заң бұзушылықсыз уақытында жеткізген. Ал мына 600 пакет көбірек баланы қамту үшін қосымша жоспарланған екен.

Шенеуніктердің айтуынша, кәсіпкерге қателіктерді түзетуге мүмкіндік берілген, бірақ олар бас тартқан. Соңында келісімшарт бұзылып, ақша бюджетке қайтарылды.