Атырау облысындағы бір отбасының қазасы: айыпталушы үш кісіні қасақана өлтіргенін мойындады

Атырау облысында бұрынғы әйелінің төрт туысын өлтірді деп айыпталған 40 жастағы Сұлтан Сәрсемәлиевке қатысты сот процесі жалғасып жатыр. Сот барысында айыпталушы кінәсін ішінара мойындады, деп хабарлады “Ақ Жайық” басылымы.

Сәрсемәлиев бұрынғы әйелінің ағасы Наурыз Мұқанғалиевті қасақана өлтірді деген айыппен келіспейтінін айтты. Оның сөзінше, ер адам өзін қорғауға тырысқан кезде абайсызда қаза болған.

Сонымен қатар айыпталушы қайын атасы Мақсот Қарабалинге пышақпен тоғыз рет, қайын енесі Насип Өтешқалиеваға сегіз рет, ал Мейрамгүл Қарабалинаға 32 рет соққы жасағанын мойындады. Сондай-ақ ол ұрлық, алаяқтық және құжаттарды заңсыз иемдену бойынша тағылған айыптарды да растаған. Оның айтуынша, мұндай әрекеттерге қылмыстың ізін жасыру үшін барған.

Бұған дейінгі сот отырысында айыпталушы қылмыстың себептері туралы айтқан. 2025 жылғы 25 желтоқсанда полицияға төрт адамнан тұратын отбасының жоғалғаны туралы арыз түскен. Кейін Атырау маңынан жоғалған ағалы-қарындастың мәйіті табылып, Индонезиядан жеткізілген Сұлтан Сәрсемәлиев кісі өлтіргенін мойындаған еді.

Наурыз айында полиция күдіктінің тергеушілерге қаза тапқандардың денесі жасырылған орынды көрсеткенін хабарлаған. Айыпталушының бұрынғы әйелі Ақбаян Мұқанғалиева бұл іс бойынша күдікті ретінде танылмаған. Қылмыс туралы хабарламау дерегі бойынша бөлек іс тіркеліп, әйелдің әрекетіне сараптама қорытындысынан кейін құқықтық баға берілмек.