Атырау облысында оқу-жаттығу кезінде сарбаз қаза тапты

Атырау облысында далалық атыс жаттығулары кезінде мерзімді әскери қызметші оқ тиіп, қаза тапты. Бұл туралы Қазақстан Қорғаныс министрлігінің баспасөз қызметі хабарлады.

Ведомство мәліметінше, оқиға 12 наурызда Атырау гарнизонының әскери бөлімінде болған. Алдын ала дерек бойынша, қайғылы жағдай қарумен абайсыз жұмыс істеу салдарынан болуы мүмкін.

Жараланған әскери қызметші дереу медициналық мекемеге жеткізілген. Дәрігерлер оған қажетті медициналық көмек көрсеткенімен, сарбаздың өмірін сақтап қалу мүмкін болмаған.

Оқиға бойынша Ішкі істер министрлігінің әскери-тергеу басқармасы қылмыстық іс қозғады. Қазір болған жағдайдың себептері мен барлық мән-жайын анықтау үшін сотқа дейінгі тергеу жүргізіліп жатыр.

Қорғаныс министрлігінің мәліметінше, оқиға орнына жан-жақты және объективті тексеру жүргізу үшін қорғаныс министрінің орынбасары жетекшілік ететін арнайы комиссия жіберілген.

Тергеу барысы Қазақстанның Бас әскери прокуратурасының бақылауында.