Атырау әкімдігінің шенеуніктері жеке меншік мектептің құрылысына бөгет болғаны үшін жазаға тартылды

Атырауда прокуратураның тікелей араласуымен жер жанжалы әділ шешімін тапты. «Nurorda» мектеп-лицейі жобасы инвесторларға меншіктеліп, құрылыс жүзеге асырылатын болды. Бұған дейін қала шенеуніктері жер телімін беруден бас тарту арқылы жұмыстарды тоқтатып қойған болатын.

Атырау облысы прокуратурасының мәліметінше, инвестордың бұзылған құқықтары Инвесторлардың құқықтарын қорғау комитетімен бірлесіп қалпына келтірілді. «NURORDA мектеп-лицейі» ЖШС Жалпыұлттық инвестициялық жобалар пулына кіреді. Болашақта бұл мекеме жалпы инвестициялық көлемі 4,5 млрд теңгені құрайтын 600 оқушыға арналған заманауи оқу орны болмақ.

Прокурорлық тексеру барысы «NURORDA» ЖШС-ның қала ішінде мектеп салуды жоспарлағанын көрсеткен, алайда жергілікті билік тарапынан “жасырын кедергіге” тап болған. Қала әкімдігі компанияға 1,5 гектар жер телімін беруден негізсіз бас тартты. Ал бұдан бұрын Өңірлік үйлестіру кеңесі инвестициялық жобаға оң шешім шығарған болатын. 

Прокурорлық қадағалау жұмыстары нәтижесінде шенеуніктердің заңсыз шешімі жойылды. Қазіргі таңда 1,5 гектар жер телімі инвесторға беріліп, алаңдағы құрылыс жұмыстары жалғасатын болды. Жол берілген бұзушылықтар үшін лауазымды тұлғалар жауапкершілікке тартылды.  

Прокуратура инвестициялық жобаларға қатысты заң нормаларының сақталуына бақылауды күшейтетінін мәлімдеді.

Атап өтейік, «NURORDA» мектеп-лицейі 2007 жылы Астанада ашылған және 20 жылдан астам уақыт бойы білім беру саласында жұмыс істеп келеді. Атырау филиалы компанияның өңірлерге кеңею стратегиясының бір бөлігі болып табылады.