Ата-аналар мектептегі тағам сапасын өздері бақылауға ниетті

Жаңа оқу жылының басында Маңғыстау облысындағы мектепте оқушылар тамақтан жаппай уланып қалған еді. Бұл оқиға бүкіл мектеп асханаларын тексеруге себеп болды. Оқу-ағарту министрі Ғани Бейсембаевтың айтуынша, мониторинг барысында 200-ден астам мектепте заңбұзушылықтар анықталды. Тексеріс кезінде тағамды сақтау және ас әзірлеудегі талаптардың сақталмағаны анықталды.

"Әділдік және өркендеу" қоғамдық қоры мектеп асханаларына қатысты әлеуметтік мониторинг жүргізіп, нәтижесін жариялады. 14 қазаннан 14 қарашаға дейінгі аралықта елдің барлық аймағынан 10 мыңға жуық ата-ана сауалнамаға қатысты. Зерттеу нәтижесінде ата-аналардың 53%-ы ғана мектептегі тамақ сапасына толық қанағаттанатындарын білдірген. Қалған 47%-ы асханалардағы тағамның сапасына, дәміне және порция көлеміне көңілі толмайтынын айтқан. 

Ата-аналардың шағымдары негізінен үш басты себепке байланысты:
1. Мәзірдің әралуан болмауы - 33%;
2. Азық-түліктің балғын болмауы - 27%;
3. Тамақ порциясының аздығы - 22%.

Мониторинг нәтижесі көрсеткендей, қала мектептерінде ата-аналардың тек 37%-ы тағам сапасын "жақсы" немесе "өте жақсы" деп бағалаған, ал ауылдық мектептерде бұл көрсеткіш 60%-ға жеткен. Қала мектептеріндегі тамақ сапасы нашар деп бағаланғандардың үлесі 17%-ды құрады.

Қордың директоры Дана Рысмұхамедованың айтуынша, ата-аналардың 35%-дан астамы, яғни әрбір үшінші ата-ана мектеп асханаларына қоғамдық бақылау жасауға дайын. Бұл мектептердегі тамақ сапасын арттыруға ықпал етуі мүмкін үлкен ресурс.

Мемлекеттік мектептердегі балалардың тамақтандыру сапасын жақсарту мақсатында қор "Қазақ тамақтану академиясымен" бірлесіп, мектеп мәзірін жетілдіруге ұсыныстар дайындап, оларды Оқу-ағарту министрлігіне жолдауды жоспарлап отыр.