Астананың жекеменшік балабақшаларына не үшін жаппай айыппұл салына бастағаны белгілі болды

Астанада жеке тұрғын үй секторында орналасқан және ұзақ жылдар бойы лицензия алып, мемлекеттік дотациямен жұмыс істеп келген жекеменшік балабақшалар қазір жаппай тексеріс пен айыппұл салудың нысанына айналды. Бұл жөнінде Amanat Business Telegram арнасы хабарлады.

Бұған дейін мұндай нысандардың қызметі қала билігі тарапынан қолдау тауып, мектепке дейінгі білімге қолжетімділікті кеңейтудің тиімді тәсілі ретінде танылып келген. Алайда соңғы бір жылда қадағалау органдары «жерді мақсатсыз пайдаланды» деген себеппен ірі көлемде айыппұл сала бастаған. Кейбір мекемеге салынған айыппұл көлемі 130 айлық есептік көрсеткішке (АЕК) жеткен.

Кәсіпкерлердің айтуынша, дәл осы коттедж үлгісіндегі ғимараттарда балабақша ашу оңай әрі жылдам болған. Әкімдік тарапынан рұқсаттар беріліп, лицензия рәсімделіп, мемлекет тарапынан дотациялар бөлінген. Соның арқасында ондаған жекеменшік балабақша 10–20 жыл бойы заңды түрде жұмыс істеп келген.

Алайда 2023–2024 жылдары жағдай күрт өзгерді. Төтенше жағдайлар басқармасы бұл нысандарды жеке тұрғын үй ретінде есептеп, олардың мектепке дейінгі ұйым ретінде қызмет етуін заң бұзушылық деп таныған.

Заң бойынша, жеке тұрғын үй секторындағы жер теліміндегі ғимаратты балабақша ретінде пайдалануға болмайды. Бірақ кәсіпкерлер бұл талапты орындау іс жүзінде мүмкін емес екенін айтады, себебі жердің нысаналы мақсатын өзгерту – ұзақ әрі қымбат процесс, ал көптеген өтінім қала бас жоспарына немесе деталды жоспарлау жобасына сәйкес келмегені үшін қабылданбайды.

Нәтижесінде мемлекет лицензия беріп, қаржылай қолдау көрсеткен нысандар қазір заң бұзушыға айналып отыр.

Бүгінде ел бойынша жеке балабақшалардың саны соңғы жиырма жылда 162-ден 6205-ке дейін өскен, ал тек Астананың өзінде 500-ден астам жеке балабақша жұмыс істейді. Солардың басым бөлігі қазір жабылу қаупінде тұр.

Бұл жағдай тек кәсіпкерлерге ғана емес, ата-аналар мен балаларға да ауыр соққы болмақ. Өйткені мемлекеттік балабақшалардағы орын тапшылығы онсыз да өзекті мәселе болып отыр.

Бизнес өкілдері бұл мәселені шешу үшін бірқатар шара ұсынуда:

• Бас жоспар мен ПДП-ны жаңарту;

• Санитарлық талаптарға сай келетін коттедждерде балабақша ашуға ресми түрде рұқсат беру;

• Жердің мақсатты пайдалану түрін өзгерту рәсімін жеңілдету;

• Уақытша ТЖД тарапынан айыппұл салуды тоқтату.

Кәсіпкерлердің айтуынша, мәселе тез арада шешілмесе, Астананың мектепке дейінгі білім беру жүйесінде дағдарыс туындауы әбден мүмкін.