Астананың өз шрифті пайда болады: Кәсіпкерлерге маңдайшаларды ауыстыру міндеттеле ме?

Елордада қалалық ортаның бірыңғай визуалды стилін қалыптастыру мақсатында арнайы «Astana Type» шрифті әзірленіп жатыр. Астана қаласының Сәулет, қала құрылысы және жер қатынастары басқармасы Informburo.kz порталына берген ресми жауабында жаңа қаріптің енгізілу тәртібі мен кәсіпкерлерге қатысты талаптарды түсіндірді.

Урбанистика орталығының директоры Елнар Базыкеннің айтуынша, қазіргі қолданыстағы көптеген шрифттерде қазақ әріптері эстетикалық тұрғыдан әдемі көрінбейді. Сондықтан халықаралық бюромен бірлесіп әзірленетін жаңа шрифт қазақ тілінің ерекшеліктеріне бейімделеді.

 «Біз қазақ әріптерін кастомизациялап, бәрін эстетикалық әрі визуалды түрде әдемі еткіміз келеді. Оны навигацияда, компаниялардың қызмет түрін сипаттауда және бүкіл қала бойынша қолдану жоспарлануда», - деді Е. Базыкен.

Басқарма мәліметінше, «Astana Type» қаріпі жаңа жобаларды іске асыру және қалалық ортаны жаңарту кезінде кезең-кезеңімен енгізіледі. Бірінші кезекте ол мына нысандарда пайдаланылады:

• Көше көрсеткіштерінде;
• Ақпараттық стендтерде;
• Қоғамдық көлік аялдамаларында;
• Қоғамдық кеңістіктерде;
• Қалалық инфрақұрылым элементтері мен маңдайшаларды әзірлеуде.

Ведомство өкілдері кәсіпкерлер үшін бұл шрифті қолдану міндетті емес екенін баса айтты. Қолданыстағы маңдайшалар мен элементтерді бір сәтте немесе мәжбүрлі түрде ауыстыру талап етілмейді.

«Қалалық шрифті қолдану елорданың бірыңғай және заманауи стилін қалыптастыруға мүмкіндік береді. Ол қалалық инфрақұрылымды жаңарту барысында біртіндеп енгізіледі», — делінген басқарма жауабында.

Еске сала кетейік, 2025 жылдың мамыр айында Астана мәслихатының депутаты Сәуле Самидин мемлекеттік тілге бейімделген шрифттердің аздығын айтып, бұл мәселені шешу үшін арнайы конкурс өткізуді ұсынған болатын.