Астаналық түлектер мектеп бітіру кешін қайырымдылық акциясына арнады

Астана қаласының мектеп түлектері дәстүрлі мейрамханадағы тойлаудан бас тартып, әлеуметтік маңызы бар игі бастаманы қолға алды. Олар мектеппен қоштасу сәтін ауыр науқасқа шалдыққан балаларға моральдық және материалдық қолдау көрсетуге арнады, деп хабарлайды Астана әкімдігі.

Іс-шара аясында түлектер мен олардың ата-аналары арнайы дайындалған сыйлықтар мен ойыншықтар жинақтады. Акцияның шарықтау шегінде түлектер автокеруені медициналық мекеме аумағына келіп, науқас балаларға арналған қолдау флешмобын ұйымдастырды. Жас түлектер «Сен – батырсың», «Мен бүгін мектеп бітірсем, ертең сен де бітіресің» деген жазулары бар плакаттар арқылы кішкентай пациенттерге демеу білдіріп, бойларына сенім ұялатты.

Санитарлық-эпидемиологиялық талаптарды қатаң сақтай отырып, жинақталған сый-сияпаттар мен жүрекжарды тілектер бүлдіршіндерге табысталды.

Жастардың айтуынша, мектеп бітіру кешін тек көңіл көтерумен шектемей, қоғамға пайдалы іспен ұштастыру – олардың саналы таңдауы. Бұл бастама мейірімділік пен жанашырлық құндылықтарын дәріптеуге бағытталған.

Айта кету керек, астаналық білім ошақтарында қайырымдылық дәстүрге айналып келеді. Бұған дейін №5 және №101 мектеп оқушылары да қиын жағдайға тап болған балаларды қолдап, оларға қайырымдылық көмек көрсеткен болатын.