Астаналық медицина қызметкерлері үшін арнайы тұрғын үй бағдарламасы қосылуы мүмкін

«AQNIET» медицина қызметкерлерінің салалық кәсіподағы медицина мамандарына арналған тұрғын үй бағдарламасының жобасын әзірледі. Бұл туралы кәсіподақтың қалалық бөлімінің меңгерушісі Еркебұлан Бүркітбаев мәлімдеді.

«Бағдарлама, әсіресе, санитарлар мен медбикелерді қамтуы керек. Біз жобаны дайындап, "Отбасы банкпен" келіссөздер жүргіздік. Сондай-ақ қала әкімінің орынбасарында болып, мәселені талқыладық. Ол денсаулық сақтау және тұрғын үй басқармаларына жобаны қарап, соңғы нұсқасын мәслихатқа немесе әкімге келісуге ұсынуды тапсырды», – деді Бүркітбаев.

Қазіргі уақытта жоба келісу кезеңінде.

Бағдарлама қалай жұмыс істейді?

Әкімдік белгілі бір қаржыны бөліп, оны "Отбасы банкке" аударады. Банк кәсіподақ ұсынған критерийлер бойынша медицина қызметкерлерін іріктеп, оларға минималды пайыздық мөлшерлемемен несиеге тұрғын үй алуды ұсынады.

Медицина қызметкерлері тұрғын үйді қаланың кез келген ауданынан таңдай алады. Орташа есеппен бір пәтердің құны 20 миллион теңгеге дейін бағаланады.

«Астанада "Елорда жастары" секілді бірнеше тұрғын үй бағдарламасы бар. Бұл бағдарламаларда әкімдік қаражат бөліп, оны банк арқылы тұрғындарға жеңілдетілген шарттармен ұсынады. Біз де кімге және қандай шарттармен берілетінін анықтап, өз ережелерімізді дайындаймыз. Банк біздің критерийлеріміз бойынша санитарлар мен медбикелерді іріктеп, оларға жеңілдетілген тұрғын үй ұсынып, өздері қалаған ауданды таңдауға мүмкіндік береді», – деп түсіндірді Бүркітбаев.