Астанаға қай өңірдің адамдары көбірек қоныс аударатыны белгілі болды

Биылғы қаңтар–маусым айларында өңірлерден елордаға қоныс аударып, тұрақты тіркеуге тұрғандар саны 80,4 мың адам болды. Бұл өткен жылдың сәйкес кезеңімен салыстырғанда 25%-ға көп және кемінде соңғы 15 жылдағы ең жоғары көрсеткіш. Мұндай деректерді Ұлттық статистика бюросы келтірді.

Осылайша, жыл басынан бері көрсеткіш жаңа межеден асты. Бұған дейін мұндай деңгей тіркелмеген. Бұл өсім өткен жылғы жоғары базаның аясында байқалып отыр: 2024 жылдың алғашқы жартысында елордаға өңірлерден көшіп келгендер саны бірден 75%-ға өсіп, 64,5 мың адамға жеткен болатын.

Соңғы екі жыл қатарынан Астана өңірлік мигранттарды Алматыға қарағанда көбірек тартып отыр. Бұған дейін оңтүстік мегаполис көшбасшы болатын.

Елордаға қоныс аударушылардың ішінде ең көп үлес Ақмола облысына тиесілі – 14,5 мың адам. Одан кейінгі орындарда Түркістан облысы (7,9 мың адам) және Алматы (7 мың адам) тұр. Осы үш өңірден келгендер жалпы астаналық болған ішкі көшіп-қонушылардың 37%-ын құрады.

Ал елордадан өңірлерге кеткендер саны қаңтар–маусым айларында 43,6 мың адам болды. Олардың көбі жаңа тұрақты мекенжай ретінде Ақмола облысын (11,5 мың адам), Алматыны (5,7 мың адам) және Түркістан облысын (3,9 мың адам) таңдаған. Бұл үш өңірдің үлесі елордадан кеткендердің 48%-ын құрады.

Нәтижесінде, ішкі миграция бойынша Астананың таза өсімі 36,8 мың адамды құрады. Бұл көрсеткіш Алматыдан жоғары: оңтүстік мегаполистің таза өсімі – 16,9 мың адам.

Айта кетерлігі, шетелден көшіп келушілер керісінше Алматыны жиі таңдайды. Жылдың алғашқы жартысында Астанаға шетелден тұрақты тұруға мың адам келсе, Алматыға 1,8 мың адам келген.