Астанадағы ЖИ-камералар бет-әлпеті мен жасына қарап іздеуде жүрген азаматтарды анықтайды

Астанада бет-әлпетті тану функциясы бар бейнемониторинг жүйесі полиция қызметкерлеріне іздеуде жүрген үш азаматты анықтауға көмектесті. Бұл туралы Ішкі істер министрлігі хабарлайды.

Заманауи технология түсірілген бейнекескіндерді қолда бар мәліметтер базасымен автоматты түрде салыстырады. Адамды іздеу тек фотосурет бойынша емес, сонымен қатар оның сыртқы белгілері - жынысы, жасы, сақалы, көзілдірігі, бетпердесі немесе баскиімінің бар-жоғы бойынша да жүзеге асырылады. Мұнымен қоса, жүйе танылған адамның бейнебақылау камералары арқылы қозғалыс бағытын бақылауға мүмкіндік береді.

Полиция департменті жүйенің тиімділігін айғақтайтын бірнеше мысалды ұсынды. Бейнемониторинг барысында технология іздеуде жүрген 40 жастағы әйелді танып, визуалды тексеріс сәйкестікті толық растады.

Екінші жағдайда жүйе сот төрелігінен жасырынып жүрген 34 жастағы ер адамды анықтады. Ақпаратты полиция қызметкерлері жедел тексеріп, жедел-іздестіру шаралары барысында күдіктіні ұстады.

Тағы бір нәтиже - ұрлық жасады деген күдікпен халықаралық іздеуде жүрген 24 жастағы азаматтың анықталуы. Деректерді тексеруден кейін ол да ұсталды.

«Осылайша, цифрлық технологиялар адамды анықтаған сәттен бастап қажетті шараларды қабылдағанға дейінгі уақытты қысқартуға және құқық қорғау органдары жұмысының жеделдігін арттыруға септігін тигізеді», - деп хабарлады полиция өкілдері.

Ведомствода заманауи бейнемониторинг жүйелерін енгізу қоғамдық қауіпсіздікті нығайтуға, іздеуде жүрген тұлғаларды уақытылы анықтауға және полиция жұмысының тиімділігін арттыруға бағытталғанын атап өтті.