Түлектерге мектеп бітіру кешіне қатысты жаңа шектеулер жарияланды

Биыл Астанада мектеп бітіру кештері бұрынғыдай «дүркіреп» өтпейтін болды. 18 маусым күні аттестат алатын түлектер мен олардың ата-аналарына полиция арнайы ескерту жасады. Басты мақсат - қауіпсіздікті сақтау және орынсыз шығындардан аулақ болу.

Полиция департаменті түлектердің қауіпсіздігі үшін бірқатар шектеу енгізді:

Мейрамхана мен табиғатқа шығуға тыйым салынады: Банкет залдарын, дәмханаларды, демалыс орындарын немесе табиғат аясын жалдап, тойлауға болмайды.

Автошеру ұйымдастыруға болмайды: Қымбат көліктермен кортеж жасап, қала көшелерімен жүруге рұқсат жоқ.

Таң атыруға тыйым: Мектеп бітіру кешінде түні бойы қыдыруға немесе таңды бірге қарсы алуға болмайды.

Ақша жинау - заңсыз

Сондай-ақ полиция мектеп әкімшілігі немесе ата-аналар комитеті тарапынан ақша жинауға, қымбат сыйлықтар сатып алуға немесе қандай да бір жарналар төлеуге қатаң тыйым салынатынын еске салды.

Құқық қорғау органдары түлектерді бұл кешті мейрамханада тойлау емес, ұстаздар мен достармен жылы қоштасу рәсімі ретінде өткізуге шақырып отыр. Айта кетейік, мектеп бітіру күндері полиция арнайы рейдтер ұйымдастырып, мейрамханалар мен демалыс орындарын қатаң тексеретін болады.