$ 446.56 € 512.34 ₽ 5.3

Астанадағы көпбалалы отбасылардың жәрдемақысы басқа өңірлерге қарағанда 10 есе көп – министр

Абдрахманов Мағжан
09 қыркүйек 2025, 11:01
Астанадағы көпбалалы отбасылардың жәрдемақысы басқа өңірлерге қарағанда 10 есе көп – министр Сурет авторы: gov.kz

Астанада тұратын көпбалалы отбасылар аймақтардағы отбасыларға қарағанда 10 есе артық жәрдемақы алып отыр. Бұл туралы Еңбек және халықты әлеуметтік қорғау министрі Светлана Жақыпова үкімет кулуарында айтты.

«Нақты мысал келтіре аламын, мәселен, Астанада алты баласы бар отбасы тоқсанына 2,7 миллион теңге алады, ал басқа өңірлерде дәл осындай отбасы 273 мың теңге жәрдемақы алады. Сондықтан әлеуметтік әділдік принципін сақтау үшін көмекті барлық аймақта тең дәрежеде беру мәселесі қарастырылып жатыр», – деді министр.

Президент Қасым-Жомарт Тоқаев өзінің Жолдауында әлеуметтік көмектің теңгерімсіздігіне назар аударып, «жұрт әлеуметтік қызметтері мен жеңілдіктері бар Астанаға қарай ағылып жатқанын» атап өткен еді.

«Қалада әлеуметтік тұрғыдан осал топтағы жандардың саны бірнеше есе артты. Әлеуметтік шығындар бюджет кірісінен жылдам өсіп келеді. Бұл міндеттемелердің үлесі тым артып барады», – деген болатын Мемлекет басшысы.

Осыған байланысты Президент әлеуметтік көмек жүйесін қайта қарауды тапсырды.

Айта кетейік, 2020 жылдың ақпанында Астанадағы Көктал-1 елдімекенінде көмірмен жылытылатын жеке үйде өрт шығып, бір отбасының бес қызы қаза тапқан еді. Сол қайғылы оқиғадан кейін көпбалалы отбасылар биліктен жәрдемақыны көбейтуді талап етіп, наразылыққа шыққан болатын.

Қазір де көпбалалы аналар қымбатшылық пен инфляция жағдайында мемлекеттен берілетін әлеуметтік қолдау жеткіліксіз екенін жиі айтып келеді.

#Көпбалалы отбасы #Жәрдемақы #Өңірлер #Светлана Жақыпова #Қасым-Жомарт Тоқаев #Әлеуметтік көмек

Соңғы жаңалықтар