Астанадағы автобустарға жолақысын төлемеген жолаушыларды анықтайтын камералар орнатылады

Астанада бейнесараптама жүйесі арқылы қоғамдық көлікте жолақысын төлемей жүрген жолаушыларды анықтау бойынша пилоттық жоба жүзеге асырылып жатыр, деп хабарлады City Transportation Systems.

Жобаның мақсаты – жолаушыларға қызмет көрсету сапасын жақсарту, жолақысын төлеуден жалтаратындар санын азайту және қоғамдық көліктердегі қауіпсіздікті арттыру.

Осы ретте, жобаның пилоттық кезеңі аясында, 2 мамырдан бастап № 24 бағдардың бір автобусында нақты уақыт режимінде деректерді талдауға мүмкіндік беретін камералар, роутерлер мен борттық компьютер орнатылды. Әр есікке қарама-қарсы орналасқан камералар кірген жолаушыларды есептейді және төлем деректерін салыстырады.

"Бұл бағдардағы жол ақысы ең көп төленбейтін уақыт пен учаскелерді дәл анықтауға мүмкіндік береді. Сонымен қатар ақпарат жедел түрде CTS-тің көліктік бақылау департаментіне жолданады", – делінген хабарламада.

Жаңа бейнебақылау іске қосылған күннен бастап жүйе бір автобуста билетсіз жол жүрудің 2 мыңнан астам жағдайын анықтады. Пилоттық жоба болғандықтан жолаушыларға айыппұл салынбады.