Астанада жылу ақысы неге қымбаттады?

Елорда тұрғындары қаңтар айына келген коммуналдық түбіртектердегі жылу ақысының өскеніне шағымдануда. Әлеуметтік желілерде кейбір пайдаланушылар төлем 3–5 мың теңгеге артқанын жазды.

Мәселеге қатысты түсініктеме берген Астана-Теплотранзит өкілдері төлем нақты тұтынған жылу көлеміне қарай есептелетінін мәлімдеді. Яғни есеп айырысу абонент қабылдаған жылу энергиясының мөлшеріне, есептегіш құрал көрсеткішіне сәйкес жүргізіледі.

Компания дерегінше, төлем көлеміне бірнеше фактор әсер етеді. Олар – бекітілген тариф, сыртқы ауаның орташа айлық температурасы және есептеу тәсілі (жылу есептегіш құралымен немесе онсыз).

«Негізгі әсер ететін фактор – ауа райы. Сырттағы температура неғұрлым төмен болса, жылу тұтыну көлемі соғұрлым артады. Тиісінше, есептелген сома да көбейеді», – делінген хабарламада.

Мәліметке сәйкес, өткен жылдың желтоқсанында орташа айлық ауа температурасы −8,1 градус болса, қаңтарда −14,3 градусқа дейін төмендеген. Бұл жылу шығынының артуына себеп болған.

Сондай-ақ компания 2026 жылдың басынан бастап тариф құрамында қосылған құн салығының мөлшерлемесі өскенін атап өтті. Алайда «Астана-Теплотранзит» бұл өзгеріс төлем сомасын қалыптастырудағы шешуші фактор емес екенін жеткізді.