Астанада жылдың ең үлгілі жас отбасы анықталды

Астана қаласында Отбасы күніне орай дәстүрлі түрде ұйымдастырылатын «Үздік жас отбасы – 2026» қалалық байқауының ақтық кезеңі өтіп, жеңімпаздары анықталды. Жас отбасылар арасындағы татулықты, өзара сыйластық пен отбасылық құндылықтарды кеңінен дәріптеуге бағытталған бұл ауқымды жобаға биыл 120-ға жуық отбасы қатысуға өтінім білдірген. Іріктеу кезеңінің нәтижесі бойынша олардың арасынан ең үздік 10 отбасы финалға өтіп, өзара бақ сынасты.

Финалдық кезеңде қатысушылар екі негізгі сын бойынша өнер көрсетті. Бірінші кезеңде отбасылар өз шаңырағының тарихы мен жетістіктерін таныстырса, екінші кезеңде өздерінің шығармашылық өнерлерін ортаға салды.

Сайыс қорытындысы бойынша Арнат Байсейітов пен Дайана Тоқбергенованың отбасы жүзден жүйрік шығып, І орынды иеленді. Ынтымағы жарасқан Әділет Молдабек пен Айымгүл Селикова ІІ орынға тұрақтаса, Алтынбек Ысқақ пен Перизат Ғабит ІІІ орынды еншіледі. Ал финалға өткен өзге жеті отбасыға арнайы ынталандыру сыйлықтары табыс етілді.

Жүлделі І орын иегерлері Арнат Байсейітов пен Дайана Тоқбергенова шараның жоғары деңгейде өткенін атап өтті: «Байқау бізге өте ұнады. Осындай өнегелі отбасылардың басын қосып, бір-бірімізбен танысып, тамаша әсер алуға мүмкіндік жасаған ұйымдастырушыларға алғыс айтамыз. Бұл біз үшін тек жеңіс емес, отбасымызбен бірге өткізген ерекше әрі ұмытылмас күн болды».

Қатысушылардың өнерін елімізге танымал сарапшылар мен қоғам қайраткерлерінен құралған қазылар алқасы бағалады. Олардың қатарында республикалық «Әкелер одағы» қоғамдық бірлестігі төрағасының орынбасары әрі ұйымның Астана қалалық филиалының төрағасы Бекдайыр Күзембай, этнограф Тұрар Шәкен, «Di Medical» медициналық орталығының директоры Клара Өмірзақова, «Алтын Орда» авторлық дизайн үйінің директоры Ырза Тұрсынзада және «Дарын» мемлекеттік жастар сыйлығының лауреаты, жыршы-әнші Күнсұлу Түрікпен болды.

«Үздік жас отбасы – 2026» байқауы Отбасы күні мерекесі аясында ұйымдастырылып, берекелі отбасы құндылықтарын насихаттауға, жас жұбайлардың қоғамдық белсенділігін арттыруға және олардың арасындағы үлгілі шаңырақтарды көпшілікке танытуға бағытталды.