Астанада жасанды интеллект киносын дамытуға 2 миллион доллар бөлінді

Қазақстан астанасы жасанды интеллект арқылы фильм түсіретін жаһандық авторлардың, инвесторлар мен технологиялық гиганттардың басын қосты. Осы аптада мәресіне жеткен алғашқы Astana AI Film Festival әлемдік рекорд орнатып, 125 елден түскен 8 067 өтініммен ЖИ-кино саласындағы ең ірі халықаралық байқау деп танылды. Үш күн бойы елорда заманауи режиссура мен цифрлық технологиялардың болашағы талқыланған басты алаңға айналды.

Сайыстың басты сенсациясы — Freedom Holding Corp. жанындағы «Freedom Шапағат» қоры бөлген 2 миллион доллар көлеміндегі ауқымды қаржылай қолдау. Оның жартысы жүлде қорын құраса, екінші жартысы Қазақстанда ЖИ-кино өндірісін дамытуға және үздік командаларға инвестиция салуға бағытталады. Сала үздіктерін ЮНЕСКО-ның бұрынғы бас директоры Одри Азуле мен белгілі кәсіпкер Баладжи Сринивасан бастаған беделді халықаралық қазылар алқасы анықтады.

Шешуші кезеңге өткен 25 финалистің туындысы MEGA Silk Way кинотеатрындағы үлкен экранда көрерменге жол тартты. Кернеулі бәсекеде Латвия режиссері Nikolay Shestak «The First Honest Day» фильмімен бас жүлде мен 450 мың долларды қанжығасына байлады. Отандық режиссер Мырзахан Жұмахан да үздіктер қатарынан көрініп, «It Was Just a Joke» комедиясындағы ерекше кейіпкері үшін жоғары бағаға ие болды. Астана бұл ауқымды шара арқылы жаһандық креативті индустрияның жаңа орталығы ретінде өзін мойындатты.