Астанада жасанды интеллект арқылы жасалған кинолар бәйгесі басталмақ

Елордада креативті индустрия үшін бірегей оқиға — Astana AI Film Festival бастау алады. Жасанды интеллект (ЖИ) технологияларын қолдана отырып жасалған қысқаметражды фильмдер байқауының жалпы жүлде қоры 1 миллион долларды құрайды.

Жобаның басты ерекшелігі — қатысушыларға шектеу қойылмауында. Өтінімдер мамыр айынан бастап тамыздың соңына дейін қабылданады. Бұл додада кәсіби киностудиялармен қатар, тәуелсіз авторлар да бақ сынай алады.

Ұйымдастырушылардың бірі Айзатулла Хуссейн бұл шараның болашағына зор сенім білдіріп отыр:

«Біз Astana AI Film Festival креативті индустриядағы жыл сайынғы маңызды оқиғаға және жаңа форматтар мен есімдер үшін тұрақты халықаралық алаңға айналады деп үміттенеміз. Уақыт пен мүмкіндік барлығына бірдей: жұмысты команда болып та, жеке креатор ретінде де тапсыруға болады», - деп атап өтті ол.

Фестиваль тек шығармашылықты ғана емес, сонымен қатар жаңа технологиялардың қауіпсіздігі мен этикасын да назарда ұстайды. Екінші ұйымдастырушы Алмас Жалидің айтуынша, смарт-технологиялар манипуляция мен фейктердің алдын алуға, сондай-ақ авторлық құқықтардың сақталуына септігін тигізеді.

«Біз бұл жерде кәсіби мамандарды да, қатардағы көрерменді де көргіміз келеді. Биыл аудиторияның талғамын бағамдап көреміз. Шыны керек, әлемдік деңгейдегі креаторлардың басын қосып, олардың не жасайтынын тамашалау бізге өте қызық. Кім біледі, бәлкім, сол жерде нағыз жауһар туынды пайда болып, біз оны толықметражды фильмге айналдырып, әлемдік кинотеатрлар мен платформаларға шығарармыз», — деді Алмас Жали.

Байқауға қатысу тегін. Қазан айында халықаралық сарапшылардан құралған қазылар алқасы үздік жұмыстардың тізімін жариялайды.