Астанада Ұлы Жеңістің 80 жылдығына арналған бірегей фотокөрме ашылды

Астанада Ұлы Жеңістің 80 жылдығына орай «Жеңістің 80 жылдығы. Kazinform фотошежіресі» атты көрме өз есігін ашты. Шараны Kazinform халықаралық ақпарат агенттігі «Қазақстан темір жолы» ұлттық компаниясымен бірлесіп ұйымдастырған.

Көрменің мақсаты – Екінші дүниежүзілік соғыста фашизмді жеңуге Қазақстан халқының қосқан үлесін фотошежіре арқылы көрсету. Экспозицияда соғыс жылдарындағы сирек кездесетін тарихи фотосуреттер, Kazinform агенттігінің фототілшілері түсірген кадрлар ұсынылған.

Kazinform – ғасырдан астам уақыт бойы ел тарихын таспаға тартып келе жатқан ақпарат агенттігі. Оның мұрағатында Екінші дүниежүзілік соғыс кезеңіне қатысты 3 мыңнан астам бірегей фотосурет сақтаулы. Бұл мұрағаттық материалдарда сол дәуірдің рухы, майдан мен тылдағы ерлік, Отанға деген сүйіспеншілік пен парызға адалдық көрініс тапқан.

«Бұл жұмыс Kazinform агенттігінің 105 жылдығы аясында жүзеге асып жатыр. Архивтегі суреттер – батырлық пен жанқиярлықтың көрінісі, олар арқылы біз өткенді құрметтеп, бүгінгі ұрпаққа тарихи шындықты жеткізгіміз келеді», – деді ҚР Президенті Телерадиокешені директорының өндіріс жөніндегі орынбасары Асқар Жалдинов.

Көрмеде аты аңызға айналған тұлғалардың фотолары да бар. Олардың қатарында екі мәрте Кеңес Одағының Батыры Талғат Бигелдинов, мерген Әлия Молдағұлова, пулеметші Мәншүк Мәметова, генерал-майор Иван Панфилов, полковник Бауыржан Момышұлы сынды батырлар бар. Сонымен қатар соғыс жылдары еңбек еткен жұмысшылар, дәрігерлер мен ғалымдардың бейнелері де көрме мазмұнын толықтыра түскен.

Фотолардың көпшілігінің авторы белгісіз, дегенмен архивте есімдері сақталған фотографтар – В. Гребнев, Ю. Редкин, Галкин. Архивті зерттеу жұмыстары әлі де жалғасып жатыр.

Көрменің бейне-нұсқасы еліміздің барлық ірі вокзалдары мен әуежайларындағы LED-экрандарда көрсетілетін болады. Ұйымдастырушылардың айтуынша, бұл – көрмені мүмкіндігінше көп адам көруі үшін жасалған қадам.