Астанада «Таза Қазақстан – Таза Астана» байқауының жеңімпаздары анықталды

Елордада Астана күні қарсаңында және «Таза Қазақстан» республикалық экологиялық акциясы аясында журналистер мен блогерлер арасындағы «Таза Қазақстан – Таза Астана» байқауының қорытындысы жарияланды. «Астана Тазалық» ЖШС ұйымдастырған шара барысында үздік шығармашылық жұмыстардың авторлары салтанатты түрде марапатталды.

Байқаудың негізгі мақсаты - қоғамның экологиялық мәдениетін арттыру, елорданың тазалығын қамтамасыз ететін коммуналдық сала қызметкерлерінің еңбегін насихаттау және қала мен оған қарасты елді мекендердің санитариялық жағдайын БАҚ-та жан-жақты жариялау болып табылады.

Екі айға созылған шығармашылық додаға бұқаралық ақпарат құралдары өкілдері тарапынан жоғары қызығушылық байқалды. Қазылар алқасының қарауына келесі бағыттар бойынша 142 авторлық жұмыс ұсынылды:

• Телевизиялық сюжеттер;

• Республикалық және өңірлік баспа басылымдарындағы мақалалар;

• Интернет-ресурстар мен әлеуметтік желілердегі жарияланымдар.

Ұйымдастырушылардың мәліметінше, өткен жылмен салыстырғанда қатысушылар саны едәуір артқан. Бұл экология және қоршаған ортаны қорғау тақырыбының қоғамдағы өзектілігі артып келе жатқанын айғақтайды.

Шараның ашылуында «Астана Тазалық» ЖШС Бас директоры Альберт Есалиев сөз сөйлеп, Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» акциясының маңыздылығына тоқталды.

«Жаңа Конституция еліміздің әділетті әрі орнықты дамуының жаңа кезеңін айқындап, елорданың саяси, әкімшілік және қоғамдық орталық ретіндегі ерекше мәртебесін бекітті. Осындай маңызды кезеңде «Таза Қазақстан» акциясының мәні одан әрі арта түседі. Тазалық — бұл тек қалалардың санитариялық жағдайы ғана емес, сонымен қатар өз үйіне, өз еліне деген құрметтің көрсеткіші. Бугінде қоғамда экологиялық сананы қалыптастыруда бұқаралық ақпарат құралдарының атқаратын рөлі ерекше», - деп атап өтті Альберт Есалиев.

Бағалау критерийлері және қорытынды

БАҚ саласының беделді сарапшыларынан құралған қазылар алқасы келіп түскен материалдарды мынадай негізгі талаптар бойынша бағалады:

1. Тақырыптың өзектілігі мен қоғамдық маңызы;

2. Ақпараттың нақтылығы мен мазмұнының тереңдігі;

3. Материалдың ұсынылу сапасы мен логикалық құрылымы;

4. Авторлық көзқарас пен шығармашылық ерекшелік.

Іріктеу қорытындысы бойынша экологиялық мәдениет пен қала тазалығын кәсіби деңгейде жариялаған үздік жұмыс авторлары анықталып, жеңімпаздар мен жүлдегерлерге арнайы дипломдар мен естелік сыйлықтар табыс етілді.

«Астана Тазалық» ЖШС баспасөз қызметінің хабарлауынша, бұл байқауды дәстүрлі түрде жыл сайын өткізу жоспарланған. Бастама алдағы уақытта да экология мен инфрақұрылым мәселелерін көтеретін медиа өкілдерін қолдауға және коммуналдық қызметтер мен қоғам арасындағы ынтымақтастықты нығайтуға қызмет етпек.