Астанада Талғат Бигелдиновтің рухына тағзым жасалды

Астанада Жеңіс күніне орай даңқты ұшқыш, екі мәрте Кеңес Одағының Батыры Талғат Бигелдиновтің ескерткішіне гүл шоқтары қойылды.

Салтанатты рәсімге Мәжіліс төрағасы Ерлан Қошанов қатысып, батыр рухына тағзым етті. Іс-шараға Парламент депутаттары, ардагерлер ұйымдарының өкілдері мен елорда тұрғындары жиналды. Қатысушылар майданда қаза тапқан жауынгерлерді бір минут үнсіздікпен еске алып, соғыс және тыл ардагерлеріне құрмет көрсетті.

Талғат Жақыпбекұлы – қазақ халқының мақтанышына айналған аңыз тұлға. Ол соғыс жылдары 305 рет әскери әуе шабуылына шығып, теңдессіз ерлігімен тарихта қалды. Даңқты ұшқыш кейін авиация генерал-майоры атанып, үш мәрте КСРО Жоғарғы Кеңесінің депутаты болып сайланған.

Бүгінде батыр есімі ел жадында мәңгі сақталып, Астана қаласындағы ескерткіші ерлік пен отансүйгіштіктің символына айналған.