Астанада спорт менеджерлеріне арналған семинар өтті

Астанада Қазақстан Ұлттық Олимпиадалық комитеті мен Olympic Solidarity бағдарламасының ұйымдастыруымен спорт менеджерлеріне арналған білім беру семинары өз жұмысын бастады. Оқу курсы NU Медицина мектебімен бірлесіп өткізіліп, оған федерациялар мен спорт ұйымдарының өкілдері қатысуда. Семинарға шамамен 50 маман жиналған.

Бағдарлама заманауи спорт менеджментінің негізгі бағыттарын қамтиды. Қатысушылар спортты басқарудағы өзекті мәселелерді, федерацияларды дамыту, халықаралық ынтымақтастық пен спорттық дипломатия, маркетинг пен коммуникация, цифрлық технологияларды енгізу, сондай-ақ спорт ғылымы, медицина және допингке қарсы саясаттың рөлін талқылайды.

Қазақстан ҰОК бас хатшысы Әлімжан Ақаевтың айтуынша, бұл семинар алдағы Олимпиада және Азия ойындары қарсаңындағы қарқынды спорттық жыл үшін ерекше маңызға ие.

– Өткен жылы спорт менеджерлеріне арналған курстар өз тиімділігін көрсетті. Биыл осы бастаманы жалғастырып, үздік тәжірибелерді дамытып отырмыз. Заманауи спорт үздіксіз кәсіби дамуды талап етеді, – деді ол.

Семинар спикерлерінің қатарында Қазақстан ҰОК Спорт департаментінің директоры Бектұр Қиятбай, Жасанды интеллектті дамыту қауымдастығы төрағасының орынбасары Анар Төлеубаева, сондай-ақ федерация басшылары мен спорттық маркетинг, еріктілер қозғалысы және медиа саласының мамандары бар.

Іс-шара барысында халықаралық жарыстарды Қазақстанда өткізу тәжірибесі, спорттағы жасанды интеллекттің дамуы, спорттық жобаларды іске қосу және ауқымын кеңейту, келіссөздер жүргізу ерекшеліктері мен спорттық дипломатия мәселелері қарастырылады. Сонымен қатар спортшылардың басқарушылық қызметке ауысуы, спорт ұйымдарының медиамен өзара іс-қимылы және спорттық медицинаның маңызды аспектілері де талқыланды.

Қазақстан гимнастика федерациясының PR-менеджері Альмира Шахаева семинардың практикалық маңызын атап өтті.

– Өткен жылғы семинар мазмұнды болды. Биылғы бағдарлама бұрын алған білімді тереңдетуге мүмкіндік берді. Спорт федерацияларының нақты қажеттіліктерін ескеретін мұндай іс-шаралар өте маңызды, – деді ол.

Айта кетейік, спорт саласындағы мамандардың біліктілігін арттыру Қазақстан Ұлттық Олимпиадалық комитеті қызметінің негізгі бағыттарының бірі болып саналады. Olympic Solidarity – Халықаралық Олимпиадалық комитеттің ұлттық олимпиадалық комитеттерді қолдауға арналған жаһандық бағдарламасы.