Астанада Өзбекстан профессоры тыңшылық күдігімен қамауға алынды

Астанада Мақсұт Нәрікбаев атындағы университетте халықаралық қатынастардан сабақ берген Өзбекстан азаматы Икболжон Корабоев екі айға жуық уақыттан бері тыңшылық жасады деген күдікпен қамауда отыр. Бұл туралы профессордың туыстарына сілтеме жасаған BBC-дің Өзбек қызметі хабарлады.

46 жастағы Корабоев – Әндіжан тумасы. Ол әйелі және кәмелетке толмаған үш баласымен Астанада тұрған. Туысының айтуынша, 3 шілдеде азаматтық киімдегі бірнеше адам оның үйіне келіп, алып кеткен. Отбасы өкілдері Корабоевқа Қылмыстық кодекстің 176-бабы – «Тыңшылық» бойынша күдік келтірілгенін айтады. Бұл бап бойынша 10 жылдан 15 жылға дейін бас бостандығынан айыру жазасы қарастырылған.

Туыстарының сөзінше, Корабоевты үйінен алып кеткен адамдар оның Астанадағы Өзбекстан консулдығының қызметкеріне ақпарат бергенін айтқан. Алайда профессордың нақты қандай ақпаратты және кімнің пайдасына берді деген күдікке ілінгені әзірге белгісіз. Қазақстанның құзырлы органдарының бұл іске қатысты ресми түсініктемесі материалда келтірілмеген.

BBC мәліметінше, Корабоевтың отбасы жеке адвокат жалдаған. Алайда қорғаушы мемлекеттік құпияға қатысты іске қатысу үшін Ұлттық қауіпсіздік комитетінің рұқсатын ала алмай отырғанын айтқан. Отбасы ҰҚК төрағасына, Бас прокурорға, Ішкі істер министріне және құқық қорғау ұйымдарына хат жолдап, профессордың адвокатпен кездесуіне кедергі келтірмеуді сұраған.

Корабоев халықаралық қатынастар мен халықаралық құқық саласын зерттеген. Оның соңғы ғылыми еңбектерінің бірі Қазақстан мен Өзбекстандағы аса маңызды минералдық ресурстарға арналған. Әріптестерінің айтуынша, зерттеуде пайдаланылған мәліметтердің бәрі ашық дереккөздерден алынған.

BBC профессордың ұсталуына оның дипломаттармен және сыртқы саясат саласындағы мамандармен байланысы немесе маңызды минералдар жөніндегі зерттеулері себеп болуы мүмкін деген болжамдарды келтіреді. Алайда бұл нұсқалардың ешқайсысы ресми түрде расталмаған.