Астанада LRT рельстерінің төрттен бірі салынды

Астанада ЛРТ желісінің жоғарғы құрылымы бойынша жұмыстардың 25 пайызы аяқталды. Бұл туралы City Transportation Systems компаниясы хабарлады.

Ұзындығы 22,4 шақырым болатын қос жолақты бағыттың 5,6 шақырымына рельс салынды. Құрылыс алаңында маневрлі локомотив, рельсті экскаватор, бетон араластырғыш, консольді кран және арнайы платформалар жұмыс істеп жатыр.

Компанияның мәліметінше, құрылыс барысында DTVII2-1 инновациялық рельстік бекіту жүйесі қолданылып жатыр. Бұл жүйе шуды 5–10 дБ-ге дейін төмендетіп, вибрацияны азайтады, сондай-ақ тозуға төзімділігі мен түрлі жағдайларға бейімділігімен ерекшеленеді.

Еске салайық, биыл қаңтарда Астана әкімі Жеңіс Қасымбек құрылыс жұмыстары 2025 жылдың жазында аяқталады деп мәлімдеген еді. Қыркүйекте алғашқы пойыздар жеткізіліп, сынақ режимінде іске қосу жоспарланып отыр.