Астанада LRT осы апта соңында іске қосылады

Астанада жеңіл рельсті көлік жүйесі – LRT осы демалыс күндері, 16–17 мамырда іске қосылады. Бұл туралы City Transportation Systems басқарма төрағасы Асылбек Дүйсебаев баспасөз туры кезінде мәлімдеді.

Оның айтуынша, жүйенің сынақтары толық аяқталған. Мамандар рельстерді, бекеттерді, байланыс желілерін, басқару және қауіпсіздік жүйелерін, пойыз құрамдарын және төтенше жағдай сценарийлерін тексерген.

«Қазір эстакада бойындағы аумақты абаттандыру, деподағы жекелеген жұмыстар мен тазалық жұмыстары жалғасып жатыр. Бұл іске қосылуға әсер етпейді. LRT жүйесі пайдалануға дайын», – деді Дүйсебаев.

LRT желісінің ұзындығы 22,4 шақырымды құрайды. Бағыт әуежай, Қабанбай батыр даңғылы, «Астана Жұлдызы» стеласы, Mega Silk Way, Ботаникалық бақ, Abu Dhabi Plaza, Министрліктер үйі, Арыс көпірі, Қалдаяқов көшесі, Ұлттық музей және «Нұрлы жол» вокзалы арқылы өтеді. Пойыздар күн сайын сағат 06:00-ден 23:00-ге дейін қатынайды.

Жолақы қолма-қол және қолма-қолсыз төлем кезінде 200 теңге болады. Төлемді FacePay, LRT көлік картасы, банк карталары, NFC жүйесі, QR-код және бір реттік билет арқылы жасауға болады.

7 мен 18 жас аралығындағы оқушылар және Астанада тіркелген жеңілдік санатындағы тұрғындар үшін жол жүру тегін болады.

Желіде 15 пойыз қатынайды, тағы төртеуі резервте сақталады. Төрт вагоннан тұратын құрамдар толық жүктемеде 600-ден астам жолаушыны тасымалдай алады.