Астанада LRT-ға жаңа атау беру ұсынысы мақұлданды

Астана қалалық мәслихатының кезектен тыс сессиясында елорданың жеңіл рельсті көлік жүйесіне (LRT) «Тарлан Астана» атауын беру туралы ұсыныс мақұлданды. Бұл туралы Тілдерді дамыту және архив ісі басқармасы басшысының орынбасары Досжан Исабек мәлімдеді.

Оның айтуынша, әкімдікке қала тұрғындарынан, қоғамдық ұйымдардан және Қазақстан Жазушылар одағының елордалық филиалынан көлік жүйесіне дербес атау беру туралы ұсыныстар түскен. Жобаның қаланың басты қоғамдық көлік желілерінің біріне айналып келе жатқанын ескере отырып, оны тек инженерлік-техникалық атаумен (LRT) шектемеу туралы шешім қабылданды. Ресми мәлімдемеде халықаралық тәжірибеге сәйкес, ірі көлік жүйелеріне елдің мәдениеті мен болмысына сай қысқа әрі брендтік атаулар берілетіні (мысалы, Ванкувердегі Skytrain, Рио-де-Жанейро аумағындағы SuperVia, Өзбекстандағы Afrosiyob) мысал ретінде көрсетілді.

Қалалық ономастика комиссиясының қарауына «Сұңқар», «Лашын», «Құлан», «Аспан» және «Тарлан» сияқты бірнеше нұсқа ұсынылып, қорытындысында комиссия мүшелері «Тарлан Астана» атауын бірауыздан қолдады. Жауапты тұлғалардың түсіндіруінше, «Тарлан» сөзі ұлттық тарих пен мәдени мұрамен тығыз байланысты және қазақ дүниетанымында жылдамдық, қуат, еркіндік пен сенімділікті білдіреді. Жаңа атау навигациялық жүйелерде, мобильді қосымшалар мен бұқаралық ақпарат құралдарында қолдануға қолайлы, сондай-ақ шетелдік туристер үшін де есте сақтауға оңай болады деп күтілуде.

Естеріңізге сала кетейік, биылғы 16 мамырда Президенттің қатысуымен ашылған бұл көлік жүйесінің қазіргі таңдағы күнделікті жолаушылар ағыны 65–75 мың адамды құрап отыр.