Астанада көліктерді ақылы эвакуациялау басталды

Астанада жол ережесін бұзып тоқтаған немесе тұрақтаған автокөліктерді ақылы түрде эвакуациялау басталды, деп хабарлады қалалық әкімдік.

Көліктер адамдар көп жиналатын орындардан, тыйым салынған аймақтардан және қозғалысқа кедергі келтіретін жерлерден әкетіледі.

Қалалық қозғалысты ұйымдастыру орталығының директоры Марат Садуовтың айтуынша, мұндай бұзушылықтар көшелердің өткізу қабілетін 50 пайызға дейін төмендетіп, кептеліс тудырады. 

Эвакуация үдерісі цифрландырылған. Арнайы жүйелер құқық бұзушылықты тіркеп, мәліметті полицияға жібереді. Осыдан кейін жүргізушіге eGov Mobile арқылы хабарлама келеді, ал шешімді полиция қызметкері электронды түрде рәсімдейді.

Егер жүргізуші оқиға орнына келіп, көлікті өзі алып кетсе, эвакуация қолданылмайды, тек әкімшілік шара қарастырылады. Ал көлігін таппаған жағдайда 102 немесе 112 нөміріне хабарласуға болады.

Көлікті эвакуациялау құны 3 айлық есептік көрсеткішті, яғни 12 975 теңгені құрайды.

Арнайы тұрақта сақтау ақысы бөлек төленеді: жеңіл көлік үшін бірінші күнге 3 АЕК, кейінгі әр күнге 5 АЕК белгіленген. Жаңа тарифтер 23 сәуірден бастап күшіне енген. Алайда 15 мамырға дейін жүргізушілерге тек ескерту жіберіледі.