Мәселе бар, шешім жоқ: Кәсіпкерлер мемлекеттік сатып алудағы кедергілерді талқылады

Кәсіпкерлердің айтуынша, 2025 жылдың 29 сәуірінен бастап мемлекеттік сатып алу порталында кәсіпкерлік субъектілерінің реестрі жұмыс істемей қалған. Соның салдарынан жаңадан тіркелген компаниялар бұл реестрде жоқ болғандықтан, мемлекеттік сатып алуларға қатыса алмай отыр. Бұл проблема мыңдаған жаңа кәсіпкердің кәсібін жүргізуіне тосқауыл болып, 1,5 айдан астам уақыт бойы күнделікті табыс көзінен айырып келеді.

Мемлекеттік сатып алулар – кәсіпкерлікті қолдаудың маңызды тетігі болып табылады. Бұл салада жыл сайын 200 мыңнан астам кәсіпкер қатысады. Мемлекеттік сатып алулар арқылы бизнес өкілдері ірі келісімшарттарға қол жеткізіп, жаңа жұмыс орындарын ашуға мүмкіндік алады.

Алайда, сәуір айынан бері жұмыс істемей тұрған Кәсіпкерлік субъектілерінің реестрі жаңадан тіркелген кәсіпкерлердің конкурсқа қатысуына кедергі келтіріп отыр. Атап айтқанда, Астана қаласының кәсіпкері, «BIG BASTAU» ЖШС Палатаға шағымданып, реестрдің істен шығуы салдарынан конкурсқа қатыса алмай отырғанын және бұл жағдай компанияның қаржылық жағдайына кері әсерін тигізіп жатқанын мәлімдеді. Ұқсас шағымдар Қызылорда облысынан да тіркелген.

Реестрге жауапты орган – ҚР Ұлттық экономика министрлігі. Министрлік қазіргі таңда техникалық ақауларды жою жұмыстары жүргізіліп жатқанын айтқанымен, жүйенің нақты қашан іске қосылатыны белгісіз болып отыр.

Бұл мәселе бойынша Палата бірнеше мекемеге, соның ішінде Есіл ауданының прокуратурасына, сондай-ақ электрондық қаржы орталығына (ЦЭФ) ресми сауал жолдады. Алайда, прокуратура арызды министрлікке қайта жолдаған. Ал ЦЭФ тарапынан нақты ақпарат берілмеген.

Кеңес отырысында министрлік пен ЦЭФ өкілдері техникалық ақаулар бар екенін растады және оларды жою жұмыстары жүргізіліп жатқанын мәлімдеді. Дегенмен, Палата бұл мәселені шешуге жеткіліксіз шаралар қабылданып жатқанын айтып, жауапты тұлғаларды жауапкершілікке тарту қажет екенін атап өтті.

Кеңес қорытындысы бойынша Астана қаласының Кәсіпкерлер палатасы прокуратура органдарына және басқа да уәкілетті мекемелерге тиісті хаттар жолдайтын болды.

Бұл жағдай кәсіпкерлердің құқықтарын қорғауда жүйелі шешімдер қабылдаудың өзектілігін тағы бір мәрте көрсетті.