Астанада халықаралық саммитке байланысты қай көшелер жабылады

Астанада 22–24 сәуір аралығында өтетін өңірлік экологиялық саммитке дайындық аясында қалада уақытша жол қозғалысына шектеулер енгізіледі.

22 сәуір күні қозғалыс кезең-кезеңімен шектеледі. Таңғы 08:00–11:00 аралығында Қабанбай батыр даңғылының EXPO бағыты жабылады. 10:00–13:00 аралығында Мәңгілік Ел даңғылының EXPO маңында қозғалысқа шектеу қойылады. Түскі уақытта 12:00–14:00 аралығында Түркістан және Сығанақ көшелерінде қозғалыс қиындайды. Ал кешкі 17:00–19:30 аралығында EXPO аумағынан қонақүйлерге шығатын бағыттар уақытша шектеледі.

23 сәуір – ең қарқынды күндердің бірі. Таңғы 07:30-дан бастап 10:00-ге дейін Қабанбай батыр даңғылы арқылы EXPO-ға кіреберістер жабылады. 10:00–13:00 аралығында Мәңгілік Ел даңғылында ішінара шектеулер енгізіледі. 13:00–15:00 аралығында Сығанақ, Орынбор және Достық көшелерінде қозғалыс шектеледі. Кешкі уақытта 17:00–20:00 аралығында Ақорда маңында жолдар жабылады.

24 сәуірде де шектеулер сақталады. Таңғы 08:00–10:00 аралығында EXPO-ға кіреберістер жабылса, 12:00–16:00 аралығында Мәңгілік Ел даңғылында қозғалыс шектеледі. Ал 15:00–19:00 аралығында Қабанбай батыр даңғылының әуежай бағытына шектеу қойылады.

Үш күн бойы негізгі жүктеме Мәңгілік Ел және Қабанбай батыр даңғылдарына, сондай-ақ Сығанақ, Түркістан, Орынбор және Достық көшелеріне түседі.

Қала тұрғындарына жол бағытын алдын ала жоспарлау, кептелістерді ескеру және балама жолдарды пайдалану ұсынылады. Әсіресе әуежайға баратын жолаушыларға уақытты ертерек есептеу қажет.

Айта кетейік, саммитке мемлекет басшылары, сарапшылар мен халықаралық ұйым өкілдері қатысады. Іс-шараға Тәжікстан президенті Эмомали Рахмон мен Моңғолия басшысы Ухнаагийн Хурэлсух келіп жетті.