Астанада баланы ұрғаны үшін сотталған балабақша қызметкері амнистиямен жазадан құтылып кетті

Астана қаласының қылмыстық істер жөніндегі ауданаралық соты балабақша тәрбиешісінің кәмелетке толмаған балаға күш көрсеткен ісін қарады. Бұл туралы Астана қалалық сотының баспасөз қызметі хабарлады.

Іс материалдарына сәйкес, сотталушы 2025 жылдың қаңтары мен ақпан айларында бірнеше рет балабақша тәрбиеленушісіне физикалық күш қолданған. Жасалған әрекеттер бейнебақылауға түсіп қалған. Видеода тәрбиеншінің баланы ұрғаны, өзге де дөрекі қимылдары анық көрінеді. Салдарынан бала жарақат алып, шошып қалған.

Сотта оның кінәсі куәлардың жауабы, сараптама қорытындысы, бейнежазбалар мен басқа да дәлелдермен расталды.

Прокурор тәрбиешіге 80 сағат қоғамдық жұмыс жазасын беріп, балалармен жұмыс істеуге тыйым салуды, сонымен қатар «Қазақстан Республикасы Конституциясының 30 жылдығына байланысты амнистия туралы» заңды қолдануды сұрады. Сотталушы өз кінәсін мойындап, қатаң жаза тағайындамауды өтінді. Ал жәбірленуші тарап бұл әрекетті ауыр қылмыс ретінде бағалап, моральдық өтемақы талап етті.

Сот сотталушының кәмелетке толмаған баласының барын және оның оң мінездемесін ескеріп, бұл жағдайды жеңілдететін мән-жай деп таныды.

"Қылмыстың сипатын және оның мән-жайын ескере отырып, сот 80 сағат қоғамдық жұмыс тағайындады. Алайда Конституцияның 30 жылдығына байланысты амнистия туралы заңға сәйкес, ол бұл жазадан босатылды", – делінген сот хабарламасында.

Сот жәбірленуші тараптың моральдық зиянды өтеу туралы азаматтық талабын ішінара қанағаттандырды.