Астанада автотұраққа төлем минутпен есептелетін болады

Астанада автотұрақ ақысы енді нақты тұрған уақытқа сай есептелмек. Бұл туралы қала әкімі Жеңіс Қасымбек депутаттық сауалға жауап беру барысында айтты.

Мәслихат депутаты Асылбек Нұралин қазіргі бір сағаттық төлем жүйесінің қолайсыз екенін айтып, пайдаланылмаған уақыт үшін ақшаны қайтару тетігін енгізуді ұсынған болатын.

Әкімнің айтуынша, елордада шлагбаум орнатылған, бейнебақылау және нөмірді автоматты тану жүйесі бар жаңа типтегі автотұрақтар іске қосылады. Сонымен қатар жаңа жүйе техникалық мүмкіндігі бар ашық коммуналдық тұрақтарға да енгізіледі.

«Жаңа жүйе бойынша автотұраққа төлем минутпен есептеледі. Сондықтан пайдаланылмаған уақыт үшін ақшаны қайтару қажеттілігі болмайды», – деді Жеңіс Қасымбек.

Алдын ала есеп бойынша, шлагбауммен жабдықталған тұрақтарда тариф – сағатына 300 теңге, ал ашық коммуналдық тұрақтарда – 100 теңге болады. Ал жеке автотұрақ иелері өз бағасын өздері белгілейді. Әкімдіктің талдауы бойынша, жеке тұрақтардағы баға 300 теңгеден 5000 теңгеге дейін өзгереді.

Қасымбектің айтуынша, қазіргі мобильді қосымша жеке серіктес – «Парковочное пространство Астаны» ЖШС-нің меншігінде. Қала әкімдігі бұл компаниямен мемлекеттік-жекеменшік әріптестік шарты бойынша жасалған келісімді бұзу рәсімін жүргізіп жатыр.

Келісім тоқтатылғаннан кейін әкімдік әзірлеген жаңа ережелерге түзетулер енгізіліп, елордада автотұрақтар үшін төлем жүйесі минуттық форматқа көшеді.