Астанада «Ауыл» партиясының республикалық активі Президент Жолдауын талқылады

Астанада «Ауыл» партиясының төрағасы Серік Егізбаевтың жетекшілігімен Мемлекет басшысы Қасым-Жомарт Тоқаевтың Қазақстан халқына Жолдауына арналған республикалық партиялық активтің отырысы өтті.

Жиынға Мәжіліс депутаттары, өңірлік филиалдардың басшылары мен өкілдері, партия белсенділері және орталық аппараттың қызметкерлері қатысты. Сондай-ақ бейнеконференция арқылы облыстық және аудандық деңгейдегі партия құрылымдары да қосылды.

Отырысты ашқан Серік Егізбаев Президент Жолдауы – елдің даму бағытын айқындайтын стратегиялық құжат екенін атап өтті. Оның айтуынша, партияның басты міндеті – Жолдаудың мазмұнын әрбір азаматқа, әсіресе ауыл тұрғындарына жеткізіп қана қоймай, оны жүзеге асыруға нақты үлес қосу.

Талқылау барысында негізгі басымдықтар ретінде ауыл шаруашылығын заманауи технологиялармен жаңғырту, ауылдық инфрақұрылымды дамыту – жол, ауыз су, интернет және әлеуметтік нысандар салу, шалғай ауыл тұрғындарын әлеуметтік қолдауды күшейту мәселелері айтылды.

Мәжіліс депутаттары да өз ойларын ортаға салып, аграрлық секторды қолдау, ауыл кәсіпкерлерін несиелеу, жастарды ауылда қалдыруға ынталандыру, білім мен медициналық қызметтің қолжетімділігін арттыру сынды ұсыныстарын айтты.

Өңірлік филиал өкілдері жұмыс орындарының жетіспеушілігі, тозығы жеткен инфрақұрылым, сапалы медициналық және білім беру қызметтерінің тапшылығы әлі де өзекті екенін жеткізді. Олар Президент бастамалары ауылдағы жағдайды жақсартуға мүмкіндік беретінін ерекше атап өтті.

Жиын соңында «Ауыл» партиясы Жолдауды халық арасында кеңінен насихаттау үшін арнайы іс-шаралар жоспарын қабылдады. Онда тұрғындармен кездесулер, форумдар, семинарлар және дөңгелек үстелдер өткізу қарастырылған.

Қорытынды сөзінде Серік Егізбаев партияның Президент реформалары мен бастамаларын жүзеге асырудағы басты күштердің бірі болуға дайын екенін айтты.

– Біздің міндетіміз – қоғамның күш-жігерін біріктіріп, Жолдаудағы тапсырмалардың орындалуын қамтамасыз ету. Біз Президент бастамаларын қолдап қана қоймай, өз жобаларымызды ұсынып, халықтың өмірін жақсартуға үлес қосамыз, – деді ол.