Астанада ақылы тұрақтардың жаңа тарифтері бекітілді: Кімдер тегін пайдалана алады?

Астанада автотұраққа арналған жаңа тарифтер бекітілді, деп хабарлады қалалық мәслихат. Жаңа ережелерге сәйкес, төлем мөлшері автотұрақтың орналасқан аймағына байланысты белгіленеді.

Құжатқа сәйкес, көше бойындағы коммуналдық автотұрақтар үш аймаққа бөлінеді: сұранысы жоғары аймақта сағатына 200 теңге, орташа аймақта – 150 теңге, ал сұранысы төмен аймақта 100 теңге төленеді. Жүргізушілерге төлемді сол күннің 23:59-ына дейін жасауға мүмкіндік беріледі.

Сондай-ақ тұрғын немесе коммерциялық нысан иелеріне өз үйлеріне іргелес аумақтағы бір автокөлік үшін тегін автотұрақ пайдалану құқығы беріледі. Ал жабық автотұрақтардың бағасын әкімдік әр нысан бойынша жеке белгілейді. Мұнда тәуліктік және айлық төлем түрлері қарастырылған.

Бұдан бөлек, бірқатар санаттағы азаматтар автотұрақты тегін пайдалана алады. Олардың қатарында соғыс және еңбек ардагерлері, І және ІІ топтағы мүгедектігі бар адамдар, көпбалалы аналар, Семей ядролық сынақ полигонынан зардап шеккендер, электр көлігі иелері және арнайы қызмет көліктері бар.

Жаңа ережелер 12 шілдеден бастап күшіне енеді.