«Астана Тазалық» қызметкерлеріне ипотека сертификаты табыс етілді

«Астана Тазалық» компаниясы биыл 7 қызметкеріне ипотека бастапқы жарнасының 50%-ын жабатын сертификат берді. Құжаттар екінші деңгейлі банктер арқылы ипотека рәсімдеуге арналған.

Бұл — кәсіпорынның кезең-кезеңімен жүзеге асырып келе жатқан әлеуметтік бағдарламасының жалғасы. Өткен жылы компания Есіл және Нұра аудандарындағы жалпы аумағы 1000 шаршы метрді құрайтын 10 тұрмыстық нысанды жаңартқан болатын. Нәтижесінде 200-ден астам жол жұмысшысы бұрынғы тар жертөле бөлмелерінің орнына заманауи демалыс және жұмысқа дайындалу орындарын пайдалана бастады. Сонымен қатар қызметкерлерге 17 пәтер және 80 орындық жатақхана берілді.

Компанияның бас директоры Замир Сағынов бағдарламаның мақсатын былай түсіндірді:

— Қалаға деген қамқорлық — күн сайын осы маңызды жұмысты атқарып жүрген жандарға қамқорлықтан басталады. Әлеуметтік қолдау бағдарламалары алдағы уақытта да кеңейтіліп, жүйелі түрде жүзеге асырылады.

Жоба Астана қаласы әкімдігінің қолдауымен іске асырылуда.