Астана полициясы күшейтілген режимде жұмыс істеуге көшті

Астанада Шанхай ынтымақтастық ұйымының саммитін өткізу кезеңінде құқық бұзушылықтардың алдын-алу және жолын кесу мақсатында полицияның жеке құрамы қызмет өткерудің күшейтілген нұсқасына ауыстырылды. Бұл туралы Астана қаласының Полиция департаменті хабарлады.

Жасақ саны ұлғайтылып, бейнебақылау қатаңдатылды. Сондай-ақ қалаға кіре берісте азаматтардың құжаты мен көлікте тыйым салынған заттардың бар-жоғын тексеру үшін полицияның «Рубеж» стационарлық бекеттері жұмыс істейді.

Автожолдардағы қауіпсіздікті қамтамасыз етуге ерекше назар аударылған. Делегациялардың арнайы колонналарының өту кезінде елорданың магистральдық көшелеріндегі қозғалыс уақытша шектелетін болады.

«Қала тұрғындары мен қонақтарына қолайлы болуы, сондай-ақ жолдарда кептелістердің туындауын болдырмау үшін мемлекеттік мекемелер мен квази­мемлекеттік секторға 2-4 шілде күндері аралығында, қызметкерлерінің 70 пайызға дейінгісін жұмысты қашықтан істеу форматына ауыстыруға кеңес берілді. Бұған қоса, 3-4 шілде күндері мектепке дейінгі мекемелер жұмыс істемейтін болады», – деп хабарлады Астана әкімдігі. 

Бұл ақпаратты елордалық Білім басқармасы растады.

«Мектепке дейінгі білім беру ұйым­дары, балабақшалар екі күн бойын, яғни 3-4 шілде күндері жұмыс істе­мейді, жабылады. Бұл Астанада Шан­хай ын­тымақтастық ұйымы саммитінің өт­кізілумен байланысты. Бізге Оқу-ағарту және Ішкі істер министр­ліктерінен осыны сұраған хаттар түсті», – деді бас­қарма мамандары.

Астана қаласының Полиция департаменті елорда тұрғындары мен қонақтарын қоғамдық тәртіпті сақтауға, қауіпсіздікті қамтамасыз ету бойынша қабылданатын шараларға түсіністік танытуға шақырады.