«Астана – Павлодар» жолында жылдамдық 110 км/сағатқа дейін шектеледі

Қыс мезгіліндегі қолайсыз ауа райы салдарынан жол-көлік оқиғаларының көбеюіне байланысты Қазақстан Республикасы Ішкі істер министрлігі халықаралық және республикалық маңызы бар автомобиль жолдарында қозғалыс қауіпсіздігін күшейту туралы шешім қабылдады.

Осы шешімге сәйкес, 2026 жылғы 9 ақпан сағат 00:00-ден бастап «Астана – Павлодар» автомобиль жолында көлік құралдары үшін рұқсат етілген ең жоғары жылдамдық 140 км/сағаттан 110 км/сағатқа дейін төмендетіледі. Аталған шектеу қысқы кезеңге арналған және уақытша сипатқа ие.

Ведомствоның мәліметінше, бұл шара жол қозғалысы қауіпсіздігін арттыруға, апат деңгейін азайтуға, сондай-ақ көктайғақ, қар басу және көріну қашықтығының төмендеуі секілді қолайсыз метеорологиялық жағдайлардан туындайтын тәуекелдерді азайтуға бағытталған.

Көктемгі-жазғы кезең басталған соң, жолдың техникалық және климаттық жағдайына қарай бұрынғы жылдамдық режимін қалпына келтіру жоспарланып отыр.

Өз кезегінде ҚазАвтоЖол ұлттық компаниясы жүргізушілерді белгіленген жылдамдықты сақтауға, жол белгілерінің талаптарын орындауға және қыс мезгілінде жолда барынша мұқият болуға шақырды.