Астана мен Алматыдағы ақылы жеке тұрақтар жойылады – Базарбек

Астана мен Алматы көшелеріндегі ақылы тұрақтар жүйесі жеке компаниялардан алынып, қалалық биліктің бақылауына өтеді. Бұл туралы Мәжіліс депутаты Бақытжан Базарбек Facebook парақшасында хабарлады.

Депутаттың мәлімдеуінше, Құрылыс кодексі жобасын талқылау кезінде жұмыс тобы оның Жер кодексінің 109-бабына енгізген түзетуін қолдаған. Түзету екі мегаполистегі жеке иеліктегі ақылы тұрақтар жүйесін тоқтатуға бағытталған.

«Алматыда олигархтар фирма-прокладка құрып, халықтан тұрақ ақысы арқылы ақша жинады. Қаланың бюджеті миллиардтаған теңгеден айырылды, кінәлілер сотталды, бірақ жүйе тоқтаған жоқ. Алматыда да, Астанада да жалғаса берді. Халық төлеп жатқанда, біреулер сол ақшамен байып отырды», — деп жазды депутат.

Оның айтуынша, ақылы тұрақтар шынайы сервис емес, пайда көзіне айналған. Инвестиция да, инфрақұрылымдық жаңару да болмаған, тек жеке тұлғалардың қалтасы толып келген.

Базарбек енді әікмдіктерге жол бойындағы аумақтарды жеке компанияларға ақылы тұрақ ретінде уақытша пайдалануға беруге тыйым салынатынын атап өтті.

«Енді Астана мен Алматыдағы тұрақтардан түскен төлемдер жеке қалталарға емес, жергілікті бюджетке түседі. Бұл – халық мүддесін қорғайтын әділ шешім», — деді ол.

Депутат бастамасын Мұрат Әбенов, Мархабат Жайымбетов, Дүйсенбек Тұрғанов, Ұлықбек Тұмашинов, Құдайберген Бексұлтанов, Ермұрат Бапи, Нұргүл Тау, Данабек Исабеков, Әділ Жұбанов, Үнзила Шапақ және Динара Наумова қолдаған.

Бақытжан Базарбектің сөзінше, бұл бастама қоғамдағы әлеуметтік әділеттілікті қалпына келтіруге бағытталған.

«Дағдарыс кезінде халықтың есебінен баю – қоғамға қарсы қылмыс. Біз бұл жүйеге нүкте қоямыз. Әділетсіз ақылы тұрақ жүйесі толық жойылады», – деп түйіндеді депутат.