Астана күніне орай елордада «Таза сана – таза қала» экологиялық викторинасы ұйымдастырылды

Астана күні мерекесіне орай және республикалық «Таза Қазақстан» экологиялық акциясы аясында елордада «Таза сана – таза қала» атты экологиялық викторина ұйымдастырылды. Шараны Астана қаласы әкімдігінің ресми қолдауымен «Астана Тазалық» ЖШС өткізді, деп хабарлады ұйымдастыру комитеті.

Елорданың орталық алаңдарының бірінде арнайы интерактивті аймақ ашылып, қала тұрғындары мен қонақтары Астана тарихы, экология, абаттандыру, тазалық қағидалары және коммуналдық қызметтердің жұмысы туралы білімдерін сынады. Сұрақтарға дұрыс жауап берген қатысушыларға экологиялық тақырыптағы арнайы естелік сыйлықтар табыс етілді. Эко-науқан барысында экологиялық мәдениетті қалыптастыру және қала тазалығын сақтайтын мамандардың еңбегін қадірлеу басты назарға алынды.

Ауқымды экологиялық акцияға жалпы есеппен 1000-нан астам адам қатысты. Іс-шара барысында белсенділік танытқан тұрғындарға 600-ден астам экологиялық сыйлық, соның ішінде «Таза сана – таза қала» ұраны бейнеленген брендтік футболкалар, кепкалар мен шопперлер үлестірілді. Сонымен қатар, Мемлекет басшысы Қасым-Жомарт Тоқаевтың оқу мәдениетін дамыту және оқитын ұлт қалыптастыру жөніндегі бастамасын қолдау мақсатында қатысушыларға 100-ден астам кітап сыйға тартылды. Олардың қатарында Абай Құнанбайұлы, Мұхтар Әуезов, Бердібек Соқпақбаев, Дулат Исабеков сияқты қазақ әдебиеті классиктерінің көрнекті шығармалары бар.

Шараның негізгі мақсаты – интерактивті формат арқылы экологиялық мәдениетті қалыптастыру және күн сайын қала тазалығын қамтамасыз етіп жүрген мамандардың еңбегінің құндылығын тұрғындарға жеткізу болып табылады.

«Біздің мақсатымыз – тек көңіл көтеретін іс-шара ұйымдастыру емес. Интерактивті формат арқылы тазалық әр адамның жеке жауапкершілігінен басталатынын еске салғымыз келеді. Коммуналдық қызметкерлердің еңбегін құрметтеу, қоршаған ортаға жанашырлықпен қарау және қарапайым тазалық қағидаларын сақтау – заманауи қаланың мәдениетін қалыптастыратын маңызды құндылықтар. Бұл мамандық иелері көбіне көзге көріне бермейді. Алайда дәл олардың күнделікті еңбегінің арқасында елорда тұрғындары таза көшелерді, саябақтарды және қоғамдық кеңістіктерді пайдаланып жүр», – деді акция ұйымдастырушысы Қымбат Бақыткелді.

Өз кезегінде қала тұрғындары да мұндай шаралардың тәрбиелік мәні зор екенін атап өтіп, экологиялық бастамаларға қолдау білдірді.

«Мұндай іс-шаралардың маңызы өте зор деп ойлаймын. Біз күн сайын таза көшелермен жүреміз, бірақ оның артында қаншама адамның еңбегі тұрғанын көп жағдайда ойлай бермейміз. Бүгін баламмен бірге викторинаға қатыса отырып, коммуналдық қызметкерлердің еңбегіне мүлде басқа қырынан қарадым. Осындай бастамалар балаларға өзгенің еңбегін құрметтеуді және қоршаған ортаға жауапкершілікпен қарауды үйретеді», – деді акция қатысушысы Жазира Болатова.

Қарқынды дамып келе жатқан Астана мегаполисінің тазалығы — қала тұрғындарының саналы көзқарасы мен күн сайын тынымсыз еңбек етіп жүрген мыңдаған адамның маңдай терінің нәтижесі. Күні бойы өткен викторина тұрғындарға мерекелік көңіл-күй сыйлап, ересектер мен балалардың басын қосты және таза қала әрбір азаматтың жеке жауапкершілігінен басталатынын тағы бір мәрте паш етті.