«Астана» қаржылық дағдарысқа тап болды: бас инвестор клубты қаржыландыруды тоқтатпақ

Елордалық «Астана» футбол клубындағы қаржылық қиындықтар ушығып барады. Клубтың футболшылар мен бапкерлерге еңбекақы бойынша қарызы бар екені хабарланған. Енді клубтың басты демеушісі – «Самұрық-Қазына» ұлттық әл-ауқат қоры қаржыландыруды толығымен тоқтатуды жоспарлап отыр.

Бұл туралы спорт журналисі Елдар Аманбаев мәлімдеді. Оның дерегінше, өткен маусымда қор «Астанаға» шамамен 3 миллиард теңге бөлген, алайда алдағы уақытта қолдаудан бас тартпақ.

Қаржы мәселесінің шиеленісуіне байланысты астаналық жанкүйерлер ел президенті Қасым-Жомарт Тоқаевтың атына ресми үндеу дайындап жатыр. «Серый CARDINAL» Telegram арнасының хабарлауынша, бейнеүндеу түсіріліп қойған болуы мүмкін, ал онда клубтың жағдайына қатысты маңызды мәселе көтеріледі деп күтіледі.

Соңғы апталарда «Астана» клубы күрделі кезеңге тап болған. Қаржы тапшылығына байланысты басшылық жаңа инвесторлар іздеп жатыр, ал кейбір кеңсе қызметкерлері шығынды қысқарту үшін қашықтан жұмыс істеуге мәжбүр болған.

Маусым қорытындысы бойынша «Астана» 57 ұпай жинап, Қазақстан Премьер-лигасында екінші орынмен шектелді. Осылайша, команда қатарынан екінші маусым чемпиондық атақтан құр қалды.

Ал спорт функционері және бұрынғы Қазақстан футбол федерациясы президенттігіне кандидат Алтай Даумов жағдайға қатысты пікір білдіріп, жанкүйерлерді сабырға шақырды.

«Уайымдамаңыздар, “Астананы” далада қалдырмайды. Егер Рақымбаев болмаса, басқа біреу клубқа қолдау көрсетеді», – деп жазды ол Instagram желісіндегі сторизінде.

2025 жылғы маусымда «Астана» ел чемпионатында екінші орын алғанымен, Лига конференциясының іріктеу кезеңінде үшінші раундтан әрі аса алмады.